Category Archives: Увер-влак

Эстон калык тоштер (ЭКТ) 19 майыште «Йӱдвел чодыран калыкше – Финн-угор сонар йолгорно» ончерым почеш. Экспозиций Финляндийын Рийхимӓки оласе Сонар музейыштыже ончыкталтеш. Тудо толшо-влакым финн-угор калык-влакын йӱлашт да нунын чодыра тӱням умылымашышт дене палдара.

Моско областьысе Мытищи оласе орван йолъече паркым марий ӱдырамашын кугу портретше ден марий тӱрлем сӧрастарат. А узорым куэ фонышто ыштыме – тидыже Марий кундемым ушештара.

Тыге маналтеш Светлана Алексееван икымше прозо книгаже. Тиде изданийыш пурышо произведенийлаште автор ончыл верым тӱҥ шотышто ӱдырамашлан ойыра, увертара Марий книга савыктыш «КонтактЫште» мервотышто.

1909–1917-ше ийлаште Иван Ключников-Палантай (24.04.1886–11.06.1926) Пермь губернийысе Усолье да Лысьва олалаште илен да пашам ыштен. Тушто тудо Сулий вӱд воктен илыше марий-влак денат палыме лийын да нуным илыме верлашкат миен коштын.

Вӱдшор тылзын 29-ше кечынже Таллинныште Родо-тукым калык-влак клубын пайрем вашлиймашыже лиеш. Мероприятий Эстон йылме институтышто 17:00 гыч 19:00 марте эрта. Уна-влак ончылно шуко ий клубым вуйлатыше Йаак Прозес ойлаш тӱҥалеш.

Марий самырыктукымын XVIII пӱтынрушэлысе слётшым эртарыме жап пале лийын. Мероприятий Марий Элын рӱдолаштыже 6 гыч 11 июль марте эрта. Тидын нерген президиумын шукерте огыл заседанийжым иктешлыме почеш Марий мер каҥашын еҥже-влак увертареныт.

Шочмо йылмын кечыже Эстонийыште 1996 ий гыч официаллын палемдалтеш. Пайрем датылан 14-ше мартым эстон серызе да поэт Кристьян Яак Петерсонын шочмо кечыж лӱмеш ойырымо. Уста сылнымутчо гимназийыште тунеммыж годымак почеламутым возаш тӱҥалын. Тидын нерген «М.А. Кастрен ушем» Facebook мервотышто воза.