89 ийыш тошкалше Свердловск областьысе марий онаеҥ Борис Алексеевич Александровын шӱмжӧ кырымым чарнен, увертара «Марий Эл» газет.
Тудо 1938 ий 25 августышто Красноуфимск район Кугу Тӓврӓ ялеш шочын. Москосо Надежда Крупская лӱмеш калык сымыктыш университетыште тунемын.
Ятыр ий Кугу Тӓврӓ школышто туныктышылан тыршен, 30 ий утла драмкружокым вӱден. Эртыше курымын 90-ше ийлаштыже шке кундемыштыже тӱвыра рӱдер вуйлатыше лийын, варажым методистлан тыршен.
Россий писатель ушемын Марий пӧлкажын еҥже, ятыр книган авторжо. Марий калык погынын делегатше Борис Алексеевич Александровым марий-влакын илыме кундемлаште чот пагалат да аклат.
Кайыме корныда волгыдо лийже, узьмакыште коштса, пагалыме Борис Алексеевич. Ме Тендам поро мут дене шарнаш тӱҥалына.
Республикысе рӱдӧ Марий Юмыйӱла ушем ешыжлан, родо-тукымжылан кугу чаманымашым каласа, воза «Марий Эл» жаплышташ.
MariUver
