Идым тылзын 27-ше кечынже Марий Элнан рӱдолаштыже Угинде пайрем эртаралтеш. Тений тудо уна-влакым икымше гана Марий паркыште чумыра. Пайремыште калык йӱлам ончыктымаш, концерт, мастарлык-класс, модыш-влак, ярмиҥга лийыт, районла гыч толшо фольклор ансамбль-влак мастарлыкыштым ончыктат, увертара «Марий Эл» газет.
Угинде пайрем кумдыкым сӧрастараш да ӱстембаке киндын кузе толын шумыжым ончыкташ манын, Марий тӱвыра рӱдерын пашаеҥже-влак кодшо кечылаште Знаменский ял шотан илем воктенысе пасуш шурно кылтам погаш лӱмынак миен коштыныт.
– Пасушто шурным сорла дене тӱредме, а варажым кылтам ыштыме годым кугезына-влакын илыш-йӱлаштым шарналтенна, пӱртӱс да мланде дене кылым шижынна, – ойла рӱдер вуйлатышын алмаштышыже Мария Ильина.
Угинде пайремым Республикысе марий тӱвыра рӱдер 2014 ий годсек эртара, воза «Марий Эл» жаплышташ.
MariUver
Фото: Республикысе марий тӱвыра рӱдер
MariUver 