Латвийыште 26 да 27 сентябрьыште Родо-тукым калык-влакын кече-влакышт эртат. Пайрем мероприятий-влак «Ригасе латыш ушемын» пӧртыштыжӧ, тыгак Алуксне кундемыште эртаралтыт. Программе Латвий ден Эстоний гыч шанчызе, семмастар да финн-угор мер пашаеҥ-влакым иктыш уша.
Ригаште икымше кече Пирет Рӓнин «Янлык-влак финн-угор калык-влакын тӱня сӱретыштышт» сылнысӱретан ончерже дене почылтеш. Тудым куратор-влакын полшымышт дене Эстонийысе «Fenno-Ugria тӧнеж» темла.
Уна-влакым тематикан лудмаш, Тарту университетын фольклористше Мадис Арукаськын лекцийже, калык кочкышым тамлымаш да кугу кас концерт вучат. «Ригасе латыш ушемын» сценыштыже Алексей Алексеевын вуйлатыме эстон-марий MariEst ансамбль ден Йаагуп Киппарын мурышо тунемшыже-влак кумылым нӧлталат.
Программым пырля мурен-куштен мучашлат.
Вес кечын пайрем Алуксне крайысе Илзене кундын Dailes («Сылнылык») тӱвыра да спорт рӱдерышкыже кусна. Тушто верысе финн-угор югыпого нерген, тыгак Маления историй да тӱвыра кундемысе лив да эстон вер-шӧр лӱм-влак нерген ончер да дискуссий-влак эртат.
Пайремым Яунлайцене ден Зиемери приход-влакын чекыштышт Делинькалнс чоҥгаште пырля мурен мучашлат.
Латвийыште Финн-угор кече-влакым эртараш «Эстоний тӱвыра капиталже» пундо ден Родо-тукым калык-влакын кугыжаныш программышт полшеныт.
MariUver
сылнысӱретан ончер – художественный выставке,
тӧнеж – учреждений,
тематикан лудмаш – тематический лудмаш,
кундо – волость,
югыпого – наследий,
пундо – фонд
