Конгресс пашажым кошартен

Марий Элыште эртыше арня родо-тукым писатель-влакын Х тӱнямбал конгрессышт эртыме дене историй лончышко возеш. Финн-угор тӱня шке ончалтышыжым угыч кугезе мландышке виктарен. Тыште ятыр лӱмлö кугыжаныш да мер пашаеҥ, поэт, прозаик, драматург, сылнымутым шымлыше-влак чумыргеныт. Нунын коклаште ончыкылык ӱшан семын волгалтыч ару ончалтышан, нöргö шӱлышан самырык автор-влак.

Финн-угор сылнымутын ончыкылыкшо, автор-влакын рвезе тукымым куштымо нерген мутланымаш М.Шкетан лӱмеш Марий кугыжаныш театрыште 11 сентябрьыште пленар заседанийлаште лие.

Ойлышо-влак конгрессын пашажлан акым пуымо дене пырля тачысе сылнымутын сай ден удажым рашемдышт, ыштышаш пашам палемдышт. Российысе родына-влак писатель ушемласе, сылнымутысо йодышлам лончылышт. Альбертина Иванова, Владимир Тимин, Надежда Федосеева, Виктор Шибанов марий, коми, удмурт писатель-влак лӱм дене мутым ойленыт.

А йот элла гыч толшо докладчик-влак, писательын илышыште верже нерген шарныктен, политика нерген шижтарен, шке сеҥымашышт нерген ойлышт. Арво Валтонын (Эстоний), Турци Иштванын, Янош Пустаин (Венгрий), Йоуни Тоссавайненын, Кари Салламаан (Финляндий) поро ойышт самырык-влаклан поснак пайдале лиеш манын ӱшаныме шуэш. Нуно южгунамже российысе авторым тыге-тыге возаш кӱлеш манынат туныктышт. Изи чотан калык-влакын сылнымутышт нунымат тургыжландара. Вет таче,  самырык автор нерген кутырышыла, ме ончыкылык  пӱрымашланна негызым пыштена.

Кокымшо заседанийлан залыште еҥ палынак шагалемын ыле. Туге гынат тидлан кöра доклад-влак шке пӱсылыкыштым ышт йомдаре. Кö колыштын шуктен огыл гын, ынде Марий Эл Тӱвыра, печать да национальность паша шотышто министерствын конгрессысе доклад-влакым савыктыман сборникшым вучаш гына кодеш.

Поро ой-каҥашым темлыме шӱлышан мутланымаш кокымшо кечын секцийыштат шуйныш. Чылаже куд секций пашам ыштен: прозо, поэзий, драматургий, сылнымут кусарымаш, савыктыме паша, йоча литератур. Секцийын пашажым Марий Эл гыч Виталий Петухов, Анатолий Тимиркаев, Наталья Кульбаева, Светлана Архипова, Альбертина Иванова, Василий Крылов вӱденыт.

Посна каласен кодымо шуэш конгрессын культур программыж нерген. Тудым Марий Эл Тӱвыра, печать да национальность паша шотышто министерстве темлен. Пленар заседаний деч ончыч Сергей Маковын «Кӱсото» кантатыже йоҥгалте. Тудым Марий Эл да Чуваш республикыласе капелла-влак йоҥгалтарышт. Конгрессын пашажым куатле хорын семже дене почмашнам кугезе йӱлам кучен илыме койышнам ончыктыш.

Курым ончыч Сергей Чавайн «Ото» почеламутшо дене сылнымутым шочыктен. Кö пала, ала тиде кантатат культур да сымыктыш тӱняште у йогыным почеш. Тыгай шӱлыш денак кастене Эрик Сапаев лӱмеш опер да балет театрын артистше-влак Элина Архипован «Алдиар» оперыжым ончыктышт. Фото да книга ончер-влакат уна-шамычлан пöлек семын лийыч.

Теҥгече кечывал деч вара делегат ден уна-влак Морко, Шернур, Оршанка районлашке унала миеныт. Тыште нуно верысе сылнымут поянлык дене палыме лийыныт да Коркатово, Марисола, Кугунур школлаште самырык авторым куштымо нерген каласкалымым колыштыныт.

Ме тӱрлö элыште илена, тӱрлын шонена, тӱрлын возена… Но мемнан кумылна икгай: ме ваш мутланен, ваш колыштын, ваш умылен, ваш полшен илаш шонена. Тыгай кумылышто аралалтеш улмаш финн-угор писатель-влакым иктеш чумырышо Х тӱнямбал конгрессын куатше.

Зоя Глушкова

Снимкыште: хант да манси калыкын делегацийже.
М.Скобелевын фотожо.

Налмывер: «Марий Эл» газет

Оставьте комментарий

Filed under Артикль-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s