Мутшо В. Красновын, семже Е. Воробьёван. Вадим Краснов ден Роза Искакова мурат.
Кече гае улат тые шокшо,
Ырыктет, да кыра шӱм-кылем.
Шижмашет тек лиеш эре шолшо,
Тудым тый пӧлеклет мыланем.
Шижмашет тек лиеш эре шолшо,
Тудым тый пӧлеклет мыланем.
Теле, шыже, кеҥеж але шошо –
Кажне пагыт сӧрал пеленет…
Ал пеледыш манам, манам: ошо!..
Нунынла кумылем сылнештет.
Ал пеледыш манам, манам: ошо!..
Нунынла кумылем сылнештет.
Шӱдыр-влакше йолгат кава мучко,
Кокыт, ончо, йолга чолганрак…
Кидпӱян гычын ныжылгын кучо,
Илыш корно лиеш каньылрак.
Кидпӱян гычын ныжылгын кучо,
Илыш корно лиеш каньылрак.
А лиеш гынже чонышто кочо,
Мый палем, тый улат пеленем…
Лавыра я поран але ночко,
Тый денет чыла тидым сеҥем.
Лавыра я поран але ночко,
Тый денет чыла тидым сеҥем.
Йӱр почешын чевер шонанпылла
Тӱрлӧ тӱс ден волгалтын илет…
Кок шӱмнаже мура кӱсле кылла,
Йӧратем мый, тый тидым палет.
Кок шӱмнаже мура кӱсле кылла,
Йӧратем мый, тый тидым палет.
Шижмашем тый декет пешак шокшо,
Итак кылмыкте тудым арам.
Шошынаже вараш кодын толшо,
Тек кужун ырыкта когыньнам.
Шошынаже вараш кодын толшо,
Тек кужун ырыкта когыньнам.
MariUver
Мурын мутшым 2023 ий 23-шо ноябрьысе «Сурт-пече» газет гыч налме
Видео: сергей мосунов
MariUver 