Финляндийыште Ӱярням пайремлат

16-шо мартыште Хельсинки олаште «Марий Ӱярня» марий тӱвыра фестиваль эрта. Тидын нерген MariUver лаштыкланна Раиса Тоссвайнен увертарыш.

Мероприятий 12 шагатлан Graniitti шукытӱвыран рӱдерыште тӱҥалеш. Тудо кок ужаш гыч шога.

Икымше ужашыжым «Таллинн марий ушем» парышдыме объединений — MTÜ Tallinna Mari Selts эртара. Алексей Алексеев шӱвырым шокта. Людмила Ямурзина организаций да Ӱярня йӱла нерген каласкала.

Вара А.Алексеевын «Мӱкш отар» чынилыш киножым ончыктат. Мучашлан Таллинн гыч уна-влак марла мурат да куштат.

Кокымшо ужашым «Марий вий тӱвыра ушем» регистрироватлыме объединений — Mari-Vij Kultuuriyhdistys Ry эртара.

Кусарыше Александра Сиивонен марий йылме дене финла палдара. Надежда Пашкина марий муро-влакым мура. Мари Шанталь (Marie Chantal) «Инвикта» индий куштымашым ончыкта.

Вара А. Алексеев кумылан-влакым марла кушташ туныкташ тӱҥалеш.

Тыгак марий вургем да кидпаша ончер почмо лиеш. Пайремыш толшо-влакым марий кочкышым тамлен ончен кертыт.