Чийӱлам кучен шогышо родына-влак ага тылзын 19-ше кечынже йӱдвел-эрвел Эстонийыште Кеҥеж пайремыштым — suvistepüha палемдат.
Лӱмлӧ кечым пайремлаш Лӓӓнэ-Вирумаа уездыште Самма ял воктен улшо Таммеалус кӱсотыш 10 шагатлан погынат.
Толшо-влак тулотым ылыжтат да подеш пучымышым шолташ сакат, верым куэ укшла дене сӧрастарат да муным чиялтат.
12 шагат гутлаште нуно тошто тумо йыр кумалаш погынат. Руна сынан акрет годсо эстон муро-влакым мурат, муным пӧрдыктен модыт да лӱҥгалтыш дене лӱҥгалтат. Тыгак ямде пучымышым кочкыт, увертара Ӱллэ Мӓнник (Ülle Männik) Facebook мервотышто.
Suvistepüha мут эстон йылме гыч «кеҥеж пайрем» семын кусаралтеш да марий Семык дене келшен толеш. Тудо эстон Кугече — munapüha деч вара шым арня эртымеке палемдалтеш. Тений эстон «Муно пайрем» 31 мартыште лийын.
Кеҥеж пайрем Касвел да Кечывалвел Эстонийыште ойыртемалтеш. Кечывалвелне тиде кеҥежым вашлийме да ӱдырамаш пайрем гын, йӱдвелне — муным пӧрдыктымӧ да лӱҥгалтыш дене мунчалтыме кече, рашемда эстон чийӱлам кучен шогышо-влакын Maavalla Koda ушемышт.
MariUver
Фото: Mavalla Koda
MariUver 