Ӱярня тылзын 15-ше кечынже Эстонийын Йыгевамаа уездыштыже верланыше Садала кугыялыште марий-влак дене палдарыше кас эртен. Тидын нерген «Тарту марий-влак ушемын» чолгаеҥже-влак Facebook-ышто увертарат.
Мероприятий 19 шагатлан Садала калык пӧртыштӧ тӱҥалын.
Наталья Пӓртин ден Светлана Салмиянова кумылан-влакым марий подкогыльым ышташ туныктеныт. Тидын годым Альбина Гаврилова ден Татьяна Алыбина «Пӱтыральым рончалте» Алабога вел мурым муралтеныт.
Вара уна-влак дене пырля марла муреныт да куштеныт. Эстон-влакым марла кушташ, «Йӱржӧ йӱреш» мурым туныктеныт.
Тыгак Тарту марий-влак ончыгоч моло марий кочкышымат ыштен конденыт да пайрем годым сийленыт.
Калыкна дене палдарыше книга да кидпаша арверым шаралтеныт. Тыгак Н. Пӓртин марий-влак нерген каласкалыше буклетым, кочкыш рецепт-влакым посна кагазеш ямдылен печатлен конден.
Мероприятий Эстонийын тӱвыра поянлык ий кышкарыштыже эртен. Тудым «Садала ял-влак ушем» парышдыме объединений — MTÜ Sadala Külade Selts организоватлен.
MariUver
Фотосӱрет-влакым Facebook мервотышто улшо Tartu Marilased тӱшка гыч налме. Видеомат туштак ончен кертыда.
кугыял — поселко
мервот — соцсеть
Уведомление: В эстонском поселке рассказали о мари | MariUver