«Марий тÿвыра, куштымаш эре чонем тургыжландареныт», —

Владимир Аптулаевтыге ойла Дöртыльö районысо Чарлак ялын рвезыже Владимир Аптулаев. Тудын дене мый тусо школышто эртарыме Тукымвож пайремыш мийымем годым палыме лийынам. Тунам Владимир пайремым эртарыше-влак кокла гыч иктыже ыле. Пеш чолга, чулым рвезе сем почеш туге лывыргын куштен. Такшым Владимир ондакат, Благовещенск педколледжыште тунеммыж годымат, «Чолман» газет дене кылым кучен, студент илыш нерген возгален. Но вара молан дыр туддеч серыш-влак толмым чарнышт.

Тений колледжым отличий дене пытарен. Визымше курсышто тунеммыж годым ялыштышт туныктышо ситыдымылан кöра «активный практика» семын Чарлак школыш туныктышылан пашаш толын, тунамак йоча-влакым кушташ туныкташ кружокым почын. Тений Йошкар-Оласе Марий кугыжаныш университетын финно-угроведений факультетышкыже тунемаш пурен. Владимир тыгак Чарлак ял ансамбльын сылнешке* вуйлатышыже улеш. Тиде сомылым 20 ияш рвезылан шукташ да сай лектышыш шуаш – манаш веле.

— Чарлак ялысе марла куштышо «Тывырдык» ансамбльлан мый да кушташ шÿмаҥше тунемше-влак тÿҥалтышым ыштенна. Школышто кружокым почмо кечын 30 утла тунемше погыныш. Нуно чыланат марла куштымашым сагыненыт улмаш. Но кече еда коллективын составше вашталт шоген да тыге 18 йоча кодын. Тÿҥ шотышто «Тывырдык» — куштышо ансамбль, но южо куштымашыже муро дене пырля шындалтеш, — куанен ойла Владимир.

— Коллективда ял кöргыштö «шочын», а умбакыже корныжо могайрак лийын? Икымше гана выступатлымыдам кöмыт онченыт?

— Ансамбльна але пеш «рвезе» гынат, район кöргыштö палымыш лектын. Икымше гана посна амалкалче* Л. Шабаеван ялыштына самырык-влаклан куштымо верым почмо пайремыште выступатленна, ик гана гына огыл Юсуп ялысе культур пöртыштö мастарлыкнам ончыктенна, ял пайремыштат участвоватленна. Дöртыльö оласе тÿвыра пöртыштö Сеҥымаш пайремлан лÿмдымö коцертыште выступатленна, тыгак композитор М. И. Петровын саскале* касыштыже лийынна. Юсуп ялын артистше-влак дене пырля Юсуп, Маядык, Маняк яллашке концерт дене миенна.

— Тугеже ансамбльыштыда чылт уста куштызо-влак улыт, манаш лиеш?

— Эн тÿҥ вашталтдыме куштызына-влак – Т. Тимиргалиева, А. Саликов, С. Мимаев, К. Калиева да молат. Татьяна Тимиргалиева тыгак уста мурызо улеш, тудын сылне йÿкшым Дöртыльö оласе культур пöлкам вуйлатышат мокталтен.

— Мут толмашеш, шкеже куштымаш аланыш кузе «логалынат»? Колынам, тый Благовещенск колледжыште эн сай куштызо семын шотлалтынат, тиде олаште куштымашет дене шуко самырык ÿдырын чонжым йÿлалтенат…

— Марий тÿвыра, куштымаш эре мыйын чонемым тургыжландареныт. Изиэм годсек марла кушташ шоненам. Благовещенск оласе педагогике колледжыш тунемаш пурымеке, вигак кружокыш ушненам да тусо «Келшымаш» (вуйлатышыже Р. Т. Мусагитов) ансамбльын еҥже лийынам. Эн сай куштызыжак лийын омыл дыр, шонем. Мый дечем мастар-влакат лийыныт, но мыят ончыл верыш лекташ тыршенам. Марла кушташ тунеммемлан кугу таум Р. Т. Мусагитовлан каласынем, вет куштышын мастарлыкше эн ондак вуйлатышын моштымашыж деч шога. Благовещенск оласе «Агидель» ансамбльын ешышкыжат ушненам ыле, но жап укелан кöра тушко коштмым чарненам. Тыгак оласе пуалтыше* оркестрыште шоктенам.

— Самырык-влак ялыштыда кузерак илат?

— Мемнан ял ÿдыр-рвезе-влак шотышто теве мом каласынем. Чарлакыште клуб уке, сандене ялын тÿвыраже пеш кугу кÿкшытыштак огыл, манаш лиеш. Калык тÿрлö мероприятийлаште участвоватлаш шона, мураш-кушташ тунемнеже. «Клуб лиеш гын, моло артист-влакат толыт ыле» маныт. Клуб укелан кöрак усталык Чарлак калыкым öрдыж гыч «эртен ошкылеш». Но самырык-влак олашке тунемаш каят да туштак кодаш тыршат.

— Владимир, пеш кугу тау чон почын мутланыметлан. Илышетше ончыкыжымат тыгак чолган эртыже, самырык шÿм-чонет умбакыжат марий калыкет верч йÿлен шогыжо.

М. АЛИКАЕВА мутланен
Дöртыльö район
Пошкырт кундем

Налмывер: «Чолман» газет

*сылнешке — художественный, посна амалкалче — частный предприниматель, саскале — творческий, пуалтыше — духовой

Оставьте комментарий

Filed under Артикль-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s