Эстонийыште Талешке кечым палемдат

27 да 28-ше апрельыште Таллинныште марий Талешке кечым палемдат. Тиде пайрем  сӧрастараш Марий Эл гыч Эстонийыш «Эреҥер» фольклор ансамбльым ӱжыныт.

Икымше кечын «Клоостри Айт» кафеште касым Яак Прозес да Виталий Рыбаков почыныт. Я.Прозес Марий Талешке кече нерген калыклан каласкален.

Ансамбльым Чернова Светлана Васильевна 20 ий наре вуйлата. Тудак кажне мурым увертарен да мо нерген мурымо нерген палдарен, а эстон йылмыш Алексей Алексеев уло кумылан кусарен.

“Эреҥерын” репертуарыштыже тӱрлӧ марий муро да куштымаш уло, садлан Талешке кечылан шуко вере илыше марий-шамычын мурыштым йоҥгалтареныт: Татарстаныште, Волжский да Морко районласе марий-влакын мурыштым, Цибикнур вел, Курыкмарий районысо, Мари-Турек кундемысе, Волжский районысо Упшер ялысе такмак-влакым, Эрвел калык мурым, Урал вел куштымашым, Шернур-Торъял мурым, Советский районысо Кельмаксола.

Ансамбльын мурызышт тыгак солист семынат шкеныштым вияҥдат. Мутлан, Алиса Халтурина тошто кужу мурым пеш мастарын калыклан ончыктен. Алиса шуко тӱрлӧ конкурслаште сеҥыше лийын. Але Ксения Бакаева весела такмак-влакым пеш устан да чолган мурен пуэн. “Эреҥерын” гармоньчыжо Анатолий Ермаков Советский район Кельмаксола рвезе, садланак ансамбльыште тиде кундемысе мурымат мурат, куштымашымат ончыктат. Поснак Иван Каменщиковым палемдыме шуэш. Тудо тошто марий муро-влакым шиялтыш, ия ковыж да шӱвыр дене шоктен. Шӱвырын йӱкшӧ калыклан келшен да чыланат вигак видеош войзаш пижыныт.

Пытартышлан Яак Прозес ансамбльлан дискым, а Анна Мишина Тарту марий-влак лӱм дене тыгак изи пӧлекым кучыктеныт.

Умбакыже кас куштымаш дене шуйнен. Ондак “Эреҥер” чылаштым тавалташ ӱжын, вара Алексей Алексеев весела такмак-влакым мурен да калыкым тарватен, а тудын деч вара эстон куштымаш лийын, увертара Елена Ласточкина.

Чыла видеом «Клоостри Айт» гыч тыште ончыза >>

Таче Марий Эл гыч уна-влак Таллинн воктен улшо Сауэ гимназийыште концертым ончыктеныт.

Кастеным 18 шагат Таллинныште, Калык университетыште, «Таллинн марий ушем» Марий касым эртара. Тушко «Эреҥер» ансамбль деч посна эше Санкт-Петербург гыч «Ош кече» ушемын еҥышт-влак унала толшаш улыт ыле.

Эрла «Эреҥер» ансамбль Нарвыш кая.

MariUver

Фото: Елена Ласточкина да Людмила Ямурзина

Видео: Елена Ласточкина, Алексей Алексеев