Мишканыште «Мурпеледыш» фестиваль эртен

11 декабрьыште Мишкан села марий калыкын кугу пайрем рÿдышкыжö савырныш. Тыште республикысе «Мурпеледыш» фестивальын пытартыш этапше эртыш. Пайремыш Башкортостаныште марий-влакын тÿшкан илыме чыла район гычат коллектив-влак толыныт ыле. Тыгак республик да районла гыч мер пашаеҥ, тÿвыра рÿдер*, верысе ялсовет администраций вуйлатыше, школ директор да моло еҥ-влакат лийыныт.

Фестиваль программын ик ужашыже – кидпаша усталык, шке ыштыме тÿрлö ÿзгар мастарлыкым ончыктымаш. Тыгай ончер районысо культур пöртын кокымшо пачашыштыже почылтын. Караидель-влак кидпашашт деч посна икмыняр уста еҥым — Шопкер ял гыч Н. Губеевым (йыдалым ышта), С. Яметовам (меж шÿртым шÿдыра), Артакуль гыч Н. Шерстобитовым (ÿяҥге воштыр гыч пеш мотор корзинка-влакым, чатырым, комдым тодеш) – конденыт.

Тÿрлö кундемла гыч толшо уста гармончо-влак музиканыштым шупшыльыч, тÿмыр, ямле шиялтыш йÿк шергылтыч, уло калык «кандырам пунаш» лекте, муро-такмак-куштымаш нöлталте.

Фестивальын тÿҥ ужашыжым Мишкан район вуйлатыше Виталий Андреев почо да сценышке кугу уна-влакым – Башкортостан тÿвыра да калык-влак кокласе кыл министрын алмаштышыже Айгуль Хабибуллинам, Калык-влак келшымаш пöртын директоржо Вельмир Азнаевым, Ишимбай район вуйлатыше Марат Гайсиным — ÿжö. Нуно республикынам вияҥдымаште моло дене пырля марий калыкынат кугу надыржым палемдышт.

Кугу концерт тÿҥале. Сценышке ик коллектив почеш весе лектыч: «Мишкан кундем» инструментальный ансамбль, «Кÿрзе мари» калык ансамбль, «Эрвел» куштышо калык ансамбль, Ишимбай район гыч уна артист-влак, Караидель районысо Шопкер ял гыч «Ший памаш» фольклор ансамбль, Шаран районысо Усола гыч «Ош пеледыш» мурышо ансамбль, Мишкан селасе йоча сымыктыш* школын «Шонанпыл» тевыкле куштышо ансамбльже*, Янаул район Тумна ял гыч «Ош пеледыш» фольклор ансамбль, Кугу Соказа ял гыч мурызо И. Шамуратова, Дöртыльö район Йывачъял гыч «Калык сем» фольклор ансамбль, Краснокам район Корий ял гыч «Эльян» образцовый фольклор ансамбль, Бирск район Кужнур ял гыч «Мурпеледыш» фольклор ансамбль, Мишкан села гыч мурызо М. Баязова, Балтач район У Теперыш ял гыч «Чолга шÿдыр» куштышо калык ансамбль, Мишкан район Нерге ялын «Ӱжара» вокал ансамбльже, Калтаса села гыч «Ший оҥгыр» ансамбль, Бурай районысо Шÿкшан ял гыч фольклор ансамбль, Уфа ола гыч «Ош виче сем» калык ансамбль, Мишкан гыч мурызо Д. Баюршина.

Марий пайрем мучашке лишеме. Валерий Садретдинов участник-влак дене пырля Мишкан районын гимнжым йоҥгалтарыш. Коллектив да посна участник-влаклан таумутан серышым, пöлекым кучыктымаш пайремын финалже лие. Марий калык шке чапшым моштен ончыктыш.

Г. ИЗИБАЕВ,
Мишкан район

Налмывер: «Чолман» газет

*тÿвыра рÿдер — центр культуры; сымыктыш — искусство; тевыкле куштышо ансамбль — образцовый хореографический ансамбль

Оставьте комментарий

Filed under Увер-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s