Республикынан рӱдӧ оласе школлаштыже тунемше марий йоча-влак «Автодор» тÿвыра пӧртыштӧ, ужар кож йыр пӧрдын, У ий лишемме нерген шижтареныт.
Нунылан тыгай пайрем кумылым Марий культур рӱдерын пашаеҥже-влак пӧлекленыт. Сылне муро, куштымаш, йомакысе герой-влак гоч йоча-шамыч шочмо калыкнан тӱвыраже, йӱлаже дене утларак палыме лийыныт.
Пайремым эртарыше-влак марла кутырымо дене гына серлаген огытыл, марий илыш дене утларак палдараш тӱрлӧ йӧным кучылтыныт. Весела модышышто икшыве-влак йыдалым да молымат ужын кертыныт, меж шӱртым шӱдырымӧ годым пайдаланыме шӱдырымат кучен онченыт. А теркеш пыштен пуымо шокшо мелнам, ӱячам ужын гына огыл, кочкынак онченыт.
Йӱштӧ Кугыза ден Лумӱдыр деч посна могай У ий? Кож йыр чумыргышо-влак деке нунат вашкеныт. Икшыве-шамычат ӧрын шоген огытыл, йӱла почеш пайрем оза-влаклан, почеламутым лудын, муралтен, шке моштымыштым ончыктеныт.
Кӧ гын кумылзак Йӱштӧ Кугызалан серышым возен: «Поро Йӱштӧ Кочана, тый дечет шукынжо пачерым, компьютерым, моло шергакан арверым йодыт. Тый чылаштын кумылыштым шукташ ямде улат. Ешыштына икшывыже мый шкетын гына улам, кертат гын, мылам иканаште кок шӱжарым пӧлекле…»
Тыгай нуно улыт, изи падырашна-влак, шкеат вучыдымын «пӧлекым» ыштен моштат.
Тидын нергенак «Марий Эл ТВ»-н видосюжетше:
Эдуард Иманаев
Налмывер: «Марий Эл» газет
