Эстон марий-влак Талешке кечым фестивальыште вашлийыныт

Марий-влак фестивальыште муратТартушто илыше марий-влак вӱдшор тылзын 26 кечынже Изи калык-влак фестивальыште марий кочкыш дене сийленыт, марла муреныт да куштеныт.

Тарту изи калык-влакын II фестивальышт кок кече шуйнен. 25 апрельыште фестивальым да ончер-влакым пайремлын почыныт. Пайрем почмаште Тарту ола вуйын полышкалышыже Владимир Шокман, культур министерстве гыч еҥ лийыныт. «Тарту марий-влак ушем» деч тушко организацийым вуйлатыше Васли Николаев коштын.

Ӱлыл залыште немыч да литва фотосӱретче-влакын выставкышт почылтын. Икымше пачаште изи залыште тӱрлӧ калыкын кидпаша ончерже шаралтын. Тушто марий тӱран арвер, пу гыч ыштыме тӱрлӧ ӱзгар, шӱвыр да молат лийыныт. Чыла тудыжым Тарту марий-влак жаплан миссионер Ану Вялиахо деч йодыныт.

Фестивальым почмо деч вара кучем еҥ да тӱрлӧ калыкле организацийын представительже-влак эше кужеш «йыргешке ӱстел» йыр кутырен шинченыт.

Эн кугу пайремже вес кечын, 26 вӱдшорын, 12 шагат гыч тӱҥалын кас марте кум пачашан Тийги Селтсимаяште, Тийги уремысе Ушем-влак пӧртыштӧ, гӱжлен.

12 шагат гыч 15 шагат марте ӱлыл нӧреп залыште марий, венгр кочкышым тамлен ончаш лийын. Марий-влак Таня Албахтинан вуйлатымыж почеш ӱстелым моторын сӧрастареныт да тӱрлӧ марий сийым темленыт. Света ден Марина Акельдинамыт, Лена Ласточкина подкогыльым ыштеныт, Анна Мишина, Инга Погонина, Валя Семенова мелнам кӱэштыныт, Лена Ведерникова — оладьим. Надя Сидоркина кок тӱрлӧ кӱктымӧ когыльым ыштен. Таня шкеже перемечым ыштен конден.

15 шагат деч вара армян, поляк да моло калык-влак шке кочкышыштым темленыт. Финн-влак гын уремыште «полевой кухньо» манмаштет пурса шӱрым шолтен ужаленыт.

Фестивальыште чылаже 13 тӱрлӧ калык лийын, тыгак мемнан родына-влак ингерманланд, эрзя-мокша да одо-влак. Кажне калыклан кӱшыл кугу залыште шкенжым ончыкташ пел шагатле пуалтын.

Мемнан марий-влакын программе пеш поян лийын. «Тыгай мотор пайрем мемнан марий калыкнан кугу пайрем — Талешке кечын эртымыже поснак куандара», — каласен тӱҥалтышыште В.Николаев. Тудо кӱчыкын ушем да марий флаг-влак дене палдарен. Вара «Марий кумыл» ансамбльын ӱдыржӧ-влак марий вургем нерген каласкален пуэныт.

Концерт «Юмо аралыже шочмо элнам» муро дене почылтын: Инга Погонина ия ковыж дене шоктен, ӱдыр-влак акапелла кок йӱк дене марла да эстонла муреныт. Вара А.Мишина «Ужар посто гай кумда олыкет» марий калык мурым йоҥгалтарен, ончыч семжым шиялтыш дене шоктен.

Поснак кугу таум одо Дима Денисовлан каласыме шуеш, тудо кӱчык жапыште кок муро семым тунем шуктен да чаплын гына шоктен. Ик мурыж годым А.Мишина марий тӱмырым пералтен.

Марий йочан, Лиза Салмиянован, «Чеверынат-чеверын» мурым мурмо годым флейте дене шоктымыжо поснак калыклан келшен. Фотосӱретче-влак куржын толынак Лизам тӱрлӧ могырч войзеныт. И.Погонина семым фортепиано дене шоктен.

Программе кок тӱшка куштымаш дене мучашлалтын: Алабога вел да Лилия Петухован такмакше почеш куштымаш-влак.

Пайрем деч вара фестивальым эртарыше-влак «Тарту марий-влак ушем» да «Марий кумыл» ансамбльлан тауштыман серыш-влакым кучыктеныт.

Васли Николаев,
Тарту марий-влак ушем
вуйлатыше

Фотосӱрет-влакым Эрик Свен Пӓртин, Васли Николаев, Арп Карм да Надя Сидоркина ыштеныт; В.Николаев келыштарен

6 комментариев

Filed under Артикль-влак, Фото-влак

6 responses to “Эстон марий-влак Талешке кечым фестивальыште вашлийыныт

  1. Аноним

    Ушемыште чолга удыр-влак гына улыт мо? Марий эрге-влакше Эстонийыште сырам гына йуын моштат ала-мо

    • Эстон марий

      Ну, такшым, тӱҥ организаторжо марий-влак вечын «сырам гына йӱын моштышо эрге» Васли Николаев лийын.

      • saiver

        моло-влак тыге-туге пашам ыштенет!!! икте пачерым саяндыя, весе диссертацийым воза, кумшо йочам онча да футбол дене модеш

  2. Эстон марий

    saiver, мый тыге умылышым Аноним марий мер паша нерген воза. А пачерым саемдымым, диссертацийым возымым, йочам ончымым мер пашалан шотлаш ок лий. Футбол дене модмыжым — лиеш. Мер паша (общественная деятельность) — тиде тӱҥ паша, еш деч вара яра жапыште шке кумылын ыштыме сомыл (рушлажа увлечений). Эрге-влакын пешыжак кумылышт уке гын, мом ыштет…

    • saiver

      Мо ышталтеш Тарту марий мер тӱняште — тиде пеш сай!!! Умбакыже ыштышаш кӱлеш.

  3. Уведомление: Тарту марий-влак эртыше ийым марла иктешленыт | MariUver

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s