26 апрельыште, Марий Талешке кечын, Мер каҥаш кажне чапкӱ воктен шарнымаш сортам чӱкташ ӱжеш.
Тиде акций Йошкар-Олаште куд шагат эрдене тӱҥалеш. Тунам мер ушем еҥ-влак лӱмлö, пагалыме еҥын чапкӱж деран чумыргат, поро ой дене марий талешке-влакым шарналтен, йӱла радамым шуктат.
Марий Элын Писатель ушемже Сергей Чавайнын, Композитор ушемже Иван Палантайын, Марий кугыжаныш университет Василий Мосоловын, М.Шкетан лӱмеш Марий калыкле* театрын артистше-влак М.Шкетанын, ВийАр ушем репрессийыш логалше-влакын чапкӱышт деке чумыргат. Йошкар-Ола мучко пöртлаште келыштарыме шарныктыше оҥа-влак декат пеледышым пыштат.
Пагалыме родына-влак! Талешке кечын шарналтыза шке кундемысе родо-тукымдам, нунын поро сугыньыштым шуктен, шочмо кундемысе чапкӱ деке лектын, сортам чӱктыза. Тыгодым иктым шотыш налза: аралтыш сорта тулат аралтышым йодеш: тудо икмыняр шагат жап йӱлышаш, мардеж да йӱр вӱд деч авыртышан лийшаш.
Зоя Глушкова
Налмывер: «Марий Эл» жаплышташ
MariUver 
>Тыгодым иктым шотыш налза: аралтыш сорта тулат аралтышым йодеш: тудо икмыняр шагат жап йӱлышаш, мардеж да йӱр вӱд деч авыртышан лийшаш.
Эстонийыште шӱгареш шындаш лӱмын аралтышан сортам ужалат: вошт койшо пластмасс кӧргыштӧ парафин сорта, кӱшныжӧ кӱртнӧ авыртыш, тыгай сорта суткат пелым йӱлышаш. Российыште тыгай уло мо?
Мер Каҥаш член-влак лӱмешат чӱкташ ида мондо сортадам.
Ээстимарийлан: уло, уло.
Мер Каҥашланат чӱктыман сортам. Нунат талешке улыт.
Чынак, кызытсе мер каНаш иленак талешке улыт, чот кертыт))))))
Илыше еҥлан марий-влак сортам огыт чӱктӧ — язык. Те нуным игылтын тыге ойледа гын (колышт ман шонеда) тидыже кок пачаш язык. Шоналтыза мом куктежтыда, марий улыда гын! Мутын вийже уло, еҥлан осалым шонымо годым осал шке декет савырнен толеш.