Йоргыкталже талант памашет, «Эрвел марий»!

ervel_mariЭртыше шуматкечын Йошкар-Олаште, Сеҥымашын ХХХ идалыкше лӱмеш тӱвыра полатыште, «Эрвел марий» мурышо да куштышо ансамбльым коло ияш лӱмгечыж дене саламлаш калык зал тич погынен.

Концерт моткоч поро шӱлыш дене эртен. Артист-влак шке веле огыл, тыгак калык денат чак кылым ыштеныт, ик ӱстелтöрыштö шинчымыла, йолташ семын мутланеныт. Тӱҥалтыштак артист-шамыч дене пырля залат эрвел марий калык мурым муралтен.

Ансамбль шке тошто, у мурыжо-влак дене калыкын чонышкыжо тыматле койышым пуртыш. А куштымашыже-влак гын калыкым тавалташак ӱжыныт, санденак верыште шинчен кертдымыже, сцена ончыко лектын, йолжым чаманыде тавалтен.

Коло ий — манаш веле. Тыгай кужу корным каяш чыла ансамбльланак пӱралтын огыл. Республикын сулло лӱмжым нумалше-влак: вуйлатыше, Олык Ипай лӱмеш премийын лауреатше Борис Дмитриев, ты премийынак лауреатше, ансамбльым коло ий вуйлатыше Тамара Дмитриева, Людмила Пашуткина — коло ий жапыште талантан ятыр артис- тым куштеныт.

Таче ансамбльыште самырык ӱдыр-рвезе-влак шукын погыненыт. Нуно Пошкырт вел гыч гына огыл, тыгак Марий Элын тӱрлö районлаж гыч улыт. Самырык вий дене ончыко каяш, у кӱкшытыш шуаш куштылгырак, тидланак кöра «Эрвел марийлан» куанаш веле кодеш. Шке помышышкышт самырык тукымым чумырен кертмышт дене ансамбльлан у шӱлышым пуртеныт, у шӱкалтышым пуэныт.

Кызыт калык лӱмым нумалше ансамбльым 1989 ийыште тунам «У вий» мер ушемым вуйлатыше (кызыт «Марий Эл» газетын тӱҥ редакторжо) Александр Абдуловын тӱҥалтышыж почеш ыштыме.

Ныл ий гыч калык лӱмым, а эше ик ий гыч самырык-влакын Олык Ипай лӱмеш Кугыжаныш премийжын лауреатше лӱмым сулен налын. Россий кӱкшытан конкурслаштат ик гана веле огыл чапланен.

Ансамбльым саламлашат ятырын толыныт. Тидыже нунын усталыкыштым пагалымым ончыкта. Эн ончычак тӱвыра, печать да национальность паша шотышто министрын икымше алмаштышыже Владимир Актанаев ансамбльлан Чап грамотым кучыктыш, «Марий памаш», «Пеледыш» ансамбль-влак шошо пайрем кечылан волгыдо шӱлышым пуртышт.

Арам огыл кум шагатат пеле шуйнышо концерт деч вара нойымо ыш шижалт. Концерт деч варат калык, тӱвыра полатын фойештыже погынен, шер теммеш мурыш-куштыш.

«Марий Эл ТВ»-н «Эрвел марий» ансамбль нерген видеосюжетше:

Л.Шабдарова

Текст: «Марий Эл» газет

Видео: http://video.vmariel.ru

Оставьте комментарий

Filed under Артикль-влак, Видео

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s