Эстонийын Вильяндимаа уездыштыже эртыше музык лагерьыште да фестивальыште марий семмастар-влакат улыт.
Ончыч сӱрем тылзын 16-шо кечыж гыч 25-ше марте Кыпушто самырык музыкчо-влаклан ETNO Estonia лагерь лийын. Туддеч вара вик XXI Вильянди фольклор фестиваль тӱҥалын да 28-ше июль марте шуйна.
США, Ирландий, Индий, Турций да моло элла гыч толшо самырык музыкчо-влак шке семӱзар дене шоктен моштымо мастарлыкыштым ончыктат. Нуно вес калык семӱзгар дене шоткаш тунемыт, шкештат мастарлык класс-влакым эртарат.
Марий кундем гыч тиде кок форумыш кӱслезе-влак Юлия Медведева да Марина Эльтемерова толыныт. Нуно вес элла гыч улшо калык сем мастар-влакым кӱсле дене шокташ туныктат, эстон родына-влаклан концертымат ончыктат, увертара Марий Эл Радио.
Марий да кок карел музыкчo-влаклан нине форумлаш толаш Эстонийыште финн-угор сомыл дене шогылтшо «Фенно-Угриа Тӧнеж» йӧным ыштен.
Фестивальыш тыгак шкевуя одо мурызо Мария Корепанова толын.
Эрла Рушэл гыч толшо финн-угор семмастар-влак чылан Сангастеш Ружа кечыш каят да тушто шке мастарлыкыштым ончыктат.
MariUver
Фото: folk.ee
