Марий Эл Радион концертше оҥайын эртен

Марий Эл Радион концертшеКодшо шуматкечын, 27 сӱремыште, Марий Эл Радио «Келшымаш» стадионышто кугу концертым эртарыш. Уло Йошкар-Ола гӱжлыш. Тиде концертыште ятыр у муро йоҥгалте, сценышке у мурызо-влак лектыч. Икманаш, концерт шуко жаплан ушышто кодеш, воза Николай Любимов шке блогыштыжо.

Марий Эл Радио шке пашажым 2005 ий 1-ше июль гыч тӱҥалын. Икымше гана эфирышке Мурызо Эчан (Александр Кожевников) лектын. «Поро эр, Марий Эл!» манын пелештен. Кызыт радиошто Володя Матвеев, Наташа Пушкина, Валерий Очеев, Марина Глушкова, Александр Кожевников, Ирина Якаева, Пётр Кожевников, Вадим Протасов, Сергей Карпов да Владимир Аптулаев тыршат.

Те Марий Эл Радиом колыштнеда гын, кеч могай йӧн дене колыштын кертыда: радиоприёмник, машиныште улшо магнитол але интернет полшымо дене. Кудыжо тыланда чотрак келша.

Марий Эл Радио тӱҥ пашаж деч пона ятыр концертым эртара. 2010 ий гыч тӱҥалын «Идалыкысе муро» концерт-фестивальым эртарат, кажне ийын Пеледыш пайремым марий дискотеке дене сӧрастарат. Ынде кандаш ий кажне кеҥежым калыкым Йошкар-Оласе стадонлаште чумырат. Ик жап «Строитель» стадионышто эртареныт. Шуко калык улмылан кӧра «Дружба» стадионыш кусненыт. Кажне концертым организатор-влак ойыртемалтшым да калыклан келшышым эртыраш тыршат, ешара Н.Любимов.

РЕГИОН 12-ын концерт нерген видеокаласкалымашыже:

Молан Марий Эл Радиом йӧратат

Кодшо гана ик ял воктенсе чодырашке снегым погаш миенна ыле. Чодыра марте ял гыч иктаж кок меҥгым ошкылман. Погена, погена да кенета чодыра мучко Марий Эл радио кутыраш тӱҥале. Ончена, кум ӱдырамаш пеш снегым пога, пеленышт – батареян радиоприемник. Палем: Марий Эл радиом пакчаштат, мончаштат, кӱтӱштат колыштыт. Но чодыраште колыштмым икымше гана ужынам да колынам. Теве кузе калык ты радиом йӧрата, «Кугарня»  газетыште Ирина Степанова сера.

Корреспондент радион пашаж нерген тудын редакторжо Наташа Пушкина дене кутырен.

Молан ты радиом калык поснак чот йӧрата?

Марий Эл Радион пашаеҥже-влак— Кушто секретше? Тиде йодышлан вашмутым муаш нелырак. Очыни, шуко амаллан кӧра. Эн ондак у улмыжлан, кеч радиоланна 8 ий темеш гынат. Вет марла кечыгут кутырышо радио эше лийын огыл. Калык шочмо йылме дене йоҥгышо передаче-влакым колышташ йӧрата. Радиошто шуко у муро йоҥга, специалист-шамычын кутырымыштым колышташ лиеш. Шке, пошкудо ялышт, вес район гыч палымыштым радио гоч колыт, нунын кузе илымыштым пален налыт. Шкет улмо годым радио йолташ семын лиеш, чонлан неле годым кумылым нӧлталеш, илаш вийым пуа.

Программе-влак

— Эн кужу ӱмыранлан «Мурпӧлек» программым шотлем. Тудо эре илаш тӱҥалеш, шонена. Ик гана Татарстаныш мийыме годым татар коллегына-влак деке пуренна ыле. Паша опытышт дене палыме лийна. Нунынат мемнан сынанрак программышт уло. Тусо коллегына-влак ойлат: «Иктаж кум ий ты программыда каяш тӱҥалеш. Вара калык ноя». Но «Мурпӧлеклан» кандаш ий эртен, калык тачат ты программыш йыҥгырта, тӱрлӧ пайрем, шочмо кече дене саламла. Нойымыла ок чуч да нигунам ок нойо, очыни. Тидын амалже тӱрлӧ. Ме, марий калык, икте-весым саламлаш, куандараш, пайремым палемдаш йӧратена.

Шуко ий шуйнышо коклашке «Уна» программым пуртыман. Ончыч вес семын маналтын, тудым Юрий Петрович Русанов тӱҥалын. Уна-влакым ӱжын, илыш, тачысе тӱрлӧ проблеме нерген кутыркален, пӱсӧ йодыш-влакым нӧлталыт. Кажне арнян тӱрлӧ уна толын. Ты программе тачат уло.

Варарак «Радиоурок», «Ӱдыр сий», «Мыскара йӧрвар», «Хитпарад», «Ӱмыргорно», «Тазалык» да эше икмыняр передаче шочыч. Кажныже колыштшылан мо дене гынат лишыл.

Пытартыш жапыште чылт у передаче шочын манын каласен ом керт. Но ме чӱчкыдын тӱрлӧ акцийым, модышым эртарена. Теве шукерте огыл лекше «Самолет» передаче пеш оҥай. Марий кундемысе географий дене кылдалтын. Шоу сынан, чыгылтыше теман «Ах, ӱдыр-влак» программе кок ий лектеш. Тудат шке колыштшыжым муын. Ончыкыжым эше оҥайрак программе-влак шочыт, шонена.

Икоян улына

— Тачысе коллектив гыч шукынжо тӱҥалтыш гычак тыште пашам ыштена, манаш лиеш. Тиде мый, Ирина Якаева, Марина Глушкова, Александр Кожевников, Сергей Карпов. Вара Владимр Матвеев ден Вадим Протасов тольыч. Ик жап гыч Валерий Очеев ушныш.

Петр Васильевын Марий Эл Радион концертше гыч фотосӱретше-влак:

MariUver

1 комментарий

Filed under Артикль-влак, Видео, Фото-влак

One response to “Марий Эл Радион концертше оҥайын эртен

  1. Волгыдо

    Концерт-влакым чынжымак сайын да онайын эртараш тыршат.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s