Илья Россыгин
26 июльышто Шернур район Кугу Пӱнчер ялыште калык артист Илья Россыгин лӱмеш пайремым эртараш тӱҥалеш.
Лӱмгече кышкар почеш артистын шочмо-кушмо суртыштыжо мемориал оҥам сакат. Пайремым Шкетан драмтеатрын артистше-влак, Шернур да Кукмарий тӱвыра рӱдерын пашеҥже-влак сӧрастараш тӱҥалыт, воза Mari-el.name сайт.
Илья Россыгин – воштылчык он
Илья Иванович Россыгин – марий калыкын ик эн йӧратыме уста артист-комикше. Тудо искусство тунян историйышкыже театрын воштылчык онжо семын пурен.
Илья Россыгин Немда эҥерын пурла серешыже верланыше Кугу Пӱнчер ял гыч улеш. Ший кудыр гай Немда эҥер, кӱкшӧ сер курык, ужар сывыным чийыше куэр – чыла тиде кугу артистын шочмо вер-шӧржо.
Россыгин 1918 ий 25 июльышто кресаньык ешеш шочын. Изинекак пеш поро кумылан, мыскарам ыштен моштышо рвезе лийын. Чыланат тудым пагаленыт: йолташ-влакат, пошкудат, родо-тукымат.
Кукнур кыдалаш школышто тунеммыж годымак тӱрлӧ мыскаралан кумылан лийын. 1934-ше ийыште Марий драмтеатрын гастроль дене толмыжо тунамак рвезын чоныштыжо артист лияш кумыл тулым ылыжтен, тудо «Мӱкш отар» спектакльым чон вургыж ончен.
1935 ийыште Илья Россыгин Йошкар-Оласе музык-театр училищыш тунемаш пураш мия. Пеш чаплын экзаменым кучен, студент радамыш ушна. Тудын нерген Нина Конакова, тунемаш налше комссийын йыжеҥже, тыге шарналтен:
« — Илья Иванович Россыгин улам – салтакла чулымын каласыш. – Ӱмаштат толынам ыле. Ийготем изи, капем кӱчык да ышда нал, а ынде латшым ияш лийынам. Поктен колташ точеда гынат, мӧҥгеш ом кай!
Фантазийже могайрак манын, колызо нерген этюдым пуышна. Ну шогылто вет. Теве-теве элнен каен, колен колтена…»
Ныл ий гыч Илья Россыгин Маргостеатрын кугу ешышкыже ушна да марий сымыктыш каваште эн волгыдо шӱдыржӧ семын йолгаш тӱҥалеш.
Марий театрыште талантан артист чылаже 60 утла рольым модын.
Илья Россыгинын чапле пашажым Марий АССР-ын Тӱҥ Каҥашыже ик гана веле огыл Чап грамота дене палемден. Тылеч посна тудлан Марий Элын сулло артистше да калык артистше лӱмым пуымо.
1962 ий 2 январьыште артистын ӱмыржӧ кенета кӱрылт каен.
Илья Иванович Россыгиным артист-влак пеш чот пагаленыт. Театрыш толшо калыкат тудын модмыжым чон канен ончен, да артистшат зритель-влакым шке велкыже савырен, кумылаҥден кертын. Йӱкшым, кап-кылжым, чурий сынжым чот вашталтыдеак сценыште модмыж годым кажне гана вес геройым шочыктен, у тӱсым пуэн.
Илья Россыгин сценын ик эн чапле мастарже, артист-комикше лийын. Тудын деч ончычат, тудын деч варажат тыгай мастарын модшо лийынжат огыл. Чынак, кугу талантан еҥ пеш шуэн шочеш да шӱдыр семынак вашке йӱлен эрта.
Илья Россыгин чыла шке рольжым устан модын. Тудо кажне у рольыш шыҥен, пеш чапле у геройын образшым чоҥен. Тыгак тудо Николай Арбанын «Кеҥеж йӱд» пьесыж почеш шындыме спектакльыште Одокимын рольжым модын.
Налмывер: Алмаматова, литератур дене урок конспект «Шочмо верем – Кукнур кундемем»
MariUver 