Тений кеҥежым «Родо-тукым кыл» парышдыме ушем – MTÜ Hõimulõimed ден Kännu Peal Käbi («Пундыш ӱмбалне пӱгыльмӧ») группо Мичиган штатысе Ханкок олашке финн Юханнус пайремыш каят. Тидын нерген организаций Facebook мервотышто увертара.
Мероприятий тений 2026 ийысе Финн-угор тӱнян тӱвыра рӱдолаже семын Ханкокын статусшылан келыштаралтын. Мӱндыр элыш миен толаш Эстонийысе родо-тукым калык-влакын программыже, Finlandia Foundation National да АУШ-ысе Эстон калыкле комитет полшат.
Визит программе кокымшо Почмо финн-угор форумышто участвоватлымым да тематикле мастар-класс-влакым эртарымым авалта. Семмастар-влакат ончышо-влаклан кызытсе uralcore стиль дене усталык пашаштым ончыктат. Ханкокышто пайрем йӱла почеш верысе финн общиным ушен шога да кундемын тӱвыра поянлыкшым арален кодаш полша.
Тений радам дене келшышын, финн-угор калык-влакын тӱрлӧ йылмышт ден тӱвыра йӱлаштлан поснак кугу тӱткыш ойыралтеш. Мероприятий-влакын раш программышт фестивальын официалле сайтыштыже да тӱвыра рӱдолан мервот лаштыкыштыже савыкталтеш.
Проектын участникше-влак тӱнямбал кӱкшытан вашкылын да океанын кок могырыштыжо мер ушем-влак коклаште кылым вияҥдымашын кӱлешлыкшым палемдат.
MariUver
Фото: Kännu Peal Käbi группо Facebook-ышто
АУШ (Амеикын Ушымо Штатше-влак) – США,
тематикле – тематический,
официалле – официальный,
мервот – соцсеть
MariUver 