Йочам аралыме тӱнямбал кечым палемдымаш Йошкар-Олаште веле огыл, моло кундемыштат рӱжге эртен.
Теве кодшо рушарнян Угарман областьысе Тонкин район, Оштамоц (Старые Краи) ялыште «Ший оҥгыр» марий эстраде муро кундем-влак кокласе VI фестиваль-конкурс лийын. Тышке Угарман областьысе районла гыч веле огыл, Киров областьысе Кикнур район да Марий Элысе Шернур, Оршанке районла гычат ӱдыр-рвезе-влак миеныт.
«Ший оҥгыр» марий эстраде муро фестивальыште Тонкин район администрацийым вуйлатышын алмаштышыже А. Баев, Шараҥ районышто Марий-влакын национально-культурный автономийыштым вуйлатыше И. Алтаева, Киров областьысе Марий-влакын советыштын председательже, Марий Мер Каҥашын членже А. Кудрявцев, Угарман область деч Мер Каҥашын еҥже Ю. Юсупов, Марий Элысе «Марий тӱвыра рӱдер» республик кӱкшытан культур учрежденийын вуйлатышыже, Марий Эл Республикын сулло артистше В. Григорьев саламлыме шомакым ойленыт. Валерий Помбеевич тыгак Марий Эл Республикын тӱвыра, печать да калык-влакын пашашт шотышто министрже М. Васютинын фестивальын участникше-шамычым саламлыме шомакшым лудын пуэн.
Айоло ужаш деч вара муро конкурс тӱҥалын. Тыштыже шке мастарлыкыштым кок мурышо ансамбль да коло ик посна мурызо ончыктен. Весымат палемдыде ок лий: шуко участникше Угарман областьысе Тонкин район, Старые Краи села гыч лийын. Туге гынат вес кундемла гыч толшо-влакат шкеныштым мӧҥгыштыштак гаяк шижыныт да тӱрлӧ муро дене куандареныт. Нунын коклаште «Мый йомакым лудам», «Ой, гармонист», «Волгыдо йӧратымаш», «Кырык марла шиеш йӓнг», «Ой, йолташем» да моло мурат йоҥгалтыныт.
Участник-влак шке коклаштышт кум категорийыште – 9 ияш марте, 9 гыч 13 ияш да 13 гыч 18 ияш марте – таҥасеныт. Марий Элысе Оршанке район гыч Миша Иванов «Шочмо-кушмо верыште» муро дене икымше верым сеҥен налын. А Шернур район гыч Настя Иванова «Шернурем-моторем» муро дене фестивальын гран-приж дене палемдалтын.
Фестиваль пытымекат, калык шаланен каяш вашкен огыл: чыланат марий сем почеш кумылын кушталтеныт. Тидлан Марий Эл Республикын сулло артисткыже Раисия Данилова шке чолгалыкше дене кумылаҥден моштен. Тудак фестиваль-конкурсымат вӱден.
«Йыргешке ӱстел» йыр мутланымаште фестиваль-конкурсым ямдылыше да эртарыше, тыгак уна-влак тыгай муро мероприятийын кӱлешлыкшым кӱкшын акленыт. Эсогыл спонсор-влакат шке кумылын фестивальыш ушненыт да кертмышт семын полшеныт. Участник-влак ий гыч ийыш ешаралтыт, сценылык вургемыштат 
утларак саемын, шкем кучен моштымыштат кушкын. Но тыгодымак икмыняр нелылыкымат палемденыт. Мутлан, Угарман областьыште илыше марий-влаклан таче кечын марий тӱвырам утларак кугу кӱкшытыш нӧлтал колташ мурымо, куштымо шотышто специалист-влак огыт сите. Тыгак тусо родына-влак марий литератур йылме дене мутланаш кумылан улыт, но чаманен каласаш логалеш, тидын шотыштат нунын нелылык изи огыл – марий литератур йылме дене мутланаш туныктышо уке. Адакшым кундем-влак кокласе тыгай фестивальлан мурызо-влакым ямдылыме шотышто семинар-практикум-влак кӱлыт, маныныт. Пытартыш конкурсышто самырык ӱдыр-рвезе-влакын репертуарыштат ийготыштлан изишак келшыдыме лийын – тидын шотыштат шоналташ уто огыл: муро текст-шамыч йоча-влаклан келшыше лийшаш улыт. А тидлан Марий муро фонограмме-влак кӱлыт.
Василий СЕМЕНОВ
Марий тӱвыра рӱдер
Видео: Tonshaevo
MariUver 
Пешак кулешан мероприятий! Чын, ордыж кундемысе йоча-влакымат мондыман огыл,нунылан кертме семын полшыман..
Пеш кугу тау мари тувыра рудерлан!
То что такие мероприятия нужны, спору нет. Но возьму на себя смелость дать совет организаторам и жюри. При таком исполнении, можно было обойтись и без гран-при. Участие в таких конкурсах для детей должно быть хорошей школой, а не собиранием званий, которые мягко говоря не отражают реальной картины. Поберегите детей, оценки надо давать реальные и называть вещи своими именами.
Туге дыр — йоча фестивальыште тан*асымаш кумыл огыл, а вашлиймаш, пайрем кумыл озаланыже. Марла сайрак мурем, осалрак мурем — тыгай шонымаш ынже шоч. Йывыртен мурышт!