25–26 вӱдшорышто Воронежыште «Турист ола-влак» II Пӱтынрушэлысе премий верч таҥасымаште элнан 41 субъектше гыч 67 кумдык лийын. Тыште Марий кундем иканаште кум суаптарым налын, увертара «Кугарня» газет.
Марий Эллан «Этнокультуран туризм регион» номинацийыште Гран-прим кучыктеныт. Тылеч посна «Турист ола-влак» конкурсышто Йошкар-Ола «Этнокультуран туризм ола» номинацийыште икымше верыш лектын. А Цикмӓ ты номинацийыштак Гран-прим сулен.
Марий Элыште тений туризм тургымым 26 вӱдшорышто почмо. Ты кечын Йошкар-Олашке «Волжский вояж» турист поезд толын. Тений ты маршрутыш мемнан рӱдоланат логалын. Поезд Моско, Шупашкар, Йошкар-Ола да Угарман гоч кудал эрта.
Ты маршрут дене толшо уна-влакым олаште муро да куштымаш дене вашлийме, нунылан поян программым ямдылыме. Турист-влак олаште экскурсийыште коштыныт, марий семӱзгар дене палдарыше сылнысеман номер-влакым онченыт, мастар-классыш ушненыт, Йошка пырысын гастрономий тоштерышкыже пурен лектыныт, марий калыкын йӱлаже, кочкышыжо дене палыме лийыныт, воза «Кугарня» газет.
MariUver
Фото-влакым Турист-увер рӱдерын «КонтактЫште» улшо лаштыкше гыч налме
MariUver 