Эрла Эстонийын эрыкан лийме кечыже лиеш

Пургыж тылзын 24-ше числаштыже Эстон Республик Эрыклык кечыжым палемда. Тӱҥ мероприятий-влак тений Таллинныште эртат.

Тиде кечын 1918 ийыште Таллинныште Эстонийын эрыклык декларацийже савыкталтын. Тудо «Эстонийын чыла калыкше-влаклан манифест» – Manifest Eestimaa rahvastele маналтын.

Тений калыкле пайремын тӱҥ мероприятийже-влак рӱдолаште эртат. Тыге 07:30 шагат эрденым Кужу Герман башньыште кугыжаныш флагым пайремлын нӧлталыт. Вара Тоомпеа кӱкшакан Губернатор садыштыже Эстоний кугыжаныш погынын – Рийгикогу председательже Лаури Хуссар пайрем мутым каласа. Эстоний евангелий-лютеран черкын архиепископшо Урмас Вийлма (Urmas Viilma) суапландара.

09:00 ш. Эрык верч сарыште колышо-влак лӱмеш шогалтыме Сеҥымаш чапкӱ деке венокым пыштат. Премьер-министр Кая Каллас (Kaja Kallas) пайрем ойжым ойла.

Элым аралыше вийын (ЭАВ) пардше 12:00 тӱҥалеш. Сарзе-влакын рыҥошкылмашыштым Эстонийын президентше Алар Карис вашлиеш. ЭАВ-ым вуйлатыше Мартин Херем парад дене командоватла.

18:00 ш. элын президентше айо мутшым йоҥгалтара.

Лӱмлӧ кечым «Эстоний» опер да балет театрыште 18:35 тӱналше президентын пайрем вашлиймашыже да концерт иктешлат, воза ERR рушла.

Чыла нине мероприятий-влак гыч рушла комментарий дене ETV+ каналыште вияш трансляций лиеш.

Манифест

Эстон тисте Кужу Герман башньыште

Парад

Парад

MariUver

Фото: Википедия, mil.ee

Эрыклык кече — День незвисимости
Эстонийын эрыклык декларацийже — Декларация о независимости Эстонии
Элым аралыше вий (ЭАВ) — Силы обороны (СО)
рыҥошкылмаш — парад