Ригысе Латыш ушемын пӧртшӧ
4-5 октябрьыште Ригыште Родо-тукым кече эрта. Тушко Эстонийыште илыше марий да вес финн-угор-влак толыт, шке калыкышт нергенат каласкалаш тӱҥалыт.
Пайрем Ригысе Латыш ушемын пӧртыштыжӧ эрта. Эстоний гыч одо, коми, ингерманланд, эрзя-мокша, сету ден эстон коллектив-влак каят. Марий-влак дене палдараш Тарту гыч 11 еҥан тӱшка тарвана.
Родо-тукым кече 12:30 почылтеш, ончыч лив ансамбль-влак выступатлат.
Вара конференций лиеш, тушто кажне калыклан 15 минут пуалтеш. Тиде жапыште кӱчыкын шке калык нерген ойлыман, видеослайд-влакым, 1-2 концерт номерым ончыктыман. Марий-влак нерген Васли Николаев каласкала, Тарту Марий-влак Ушемын «Марий кумыл» ансамбльже муралтен-кушталатен пуа.
Конференций деч вара тӱрлӧ калыкын кочкышыжым тамлен ончаш лиеш. Одо сӱретче Станислав Антиповын ончерже почылтеш.
Кастеным 18 шагат гыч 20 шагат марте финн-угор ансамбль-влак концертым ончыктат, да ончаш толшо-влакым шке калык куштымашыштым кушташ туныктат.
Вес кечын, 5 октябрьыште, уна-влакым Ригыште эстон да лив культур дене кылдалтше верлаш экскурсийыш наҥгаят. Пайремыш толшо-влак каналтен, олам ончал савырнен, кастеным мӧҥгышкышт тарванат.
Пайремым Эстонийыште улшо Латыш культур ушем ден Фенно-Угрий Тӧнеж, Ригыште улшо Латыш ушем ден Лив ушем эртарат, Латвийыште улшо эстон, финн да венгр посольство-влак полшат. Эстоний гыч уна-влаклан пайремыш миен толаш Фенно-Угрийлан оксам Родо-тукым программе ойырен.
Ригысе Латыш ушемын пӧртшӧ нерген рушла >>
Пайрем афише латышла:
Фенно-Угрийын уверже негызеш
MariUver
MariUver 
Пеш сай паша! Корныда лийже!
Кугу тау поро шомакетлан, Ондрий 🙂
Можыч Эстонийыште уже марий республикым почаш пагыт шуын?
Поро!
«Маска копа» латыш ансамбльым у:жса. Нуно Марий Элыш сентябрь тылзыште толын коштыныт ыле. Пеш он:ай да ку:лешан пашам ыштат. Эсогыл марий вуйпидышым ышташ вынерым нан:гаеныт. Марий ту:выра дене Латвийыште палдараш со:реныт.
Адресыштым организатор-влак гочда муаш лиеш.
Кеч унала толын кайышт. Тидат пайда.