Шыжа тылзын 3-шо кечынже Финляндийыште, Тампере олаште, Sugrifest финн-угор фестиваль эртен. Тушто марий-влакат лийыныт.
Тиде кечынак олан кечыже лийын, да пайрем тудын кышкарыштыже эртен. Фестиваль Laikku тӱвыра пӧртыштӧ 10 шагат гыч 17 шагат марте шуйнен.
Фестиваль программе пеш поян лийын: мероприятий-влак кум пачашыште эртеныт.
Кокымшо пачашыште ярмиҥга лийын. Тӱрлӧ финн-угор ушем-влак шке ӱстелыштым шареныт. Марий-влакат, Анна Макеев мокша Евгений Макеев марийже дене пырля, Раиса Тоссавайнен да мый, Васли Николаев, Аннан да Раисан кондымо арверым вераҥденна. Тӱрлӧ марий тӱран кидпаша, книга, CD-диск да моло арвер пеш шуко лийын. Р. Тоссавайнен марий кочкышым ыштен да вургем ончерым конден, А. Мишина тӱрлӧ йӱышым темлен.
Марий-влак деч посна верысе венгр, карел, эстон, Россий-Финляндий, Финляндийысе чийӱлам кучен шогышо ушем-влакын, тыгак саам да моло калык гыч кидпашам ыштыше-влакын ӱстелышт лийын. Латвий гыч толшо Дмитрий Щеголев кревин-влак дене палдарен. Таллинн коми-влакат шкеныштым ончыктеныт.
11:30 ш. ярмиҥга верыштак Рыбаковмытын еш ансамбльышт шке мастарлыкшым ончыктен. Нуно коктынат Марий Эл Кужэҥер район Кугу Чарнур гыч улыт. Кызыт Виталий Эстонийыште да акаже Финляндийыште илат.
Кумшо пачашыште Сылнысем залыште лекций-влакым лудыныт да тыгак калык муро да куштымаш лийын. Тыге эстон Piibar шоктышо да Vingerpussid куштышо ансамбль-влак калыкым тӱшка куштымашке луктыныт.
Кумшо пачашыштак вес залыште йылме да тӱвыра мастар-класс-влак эртеныт. Тушто венгр, эстон, коми, карел да моло йылме да культур дене палдареныт. 14:15 ш. Васли Николаев ден Анна Макеев марий йылме дене палдареныт. Анна мучашыште ик мурым муралтен пуэн.
15:30 ш. MariEst дуэт да Piibar ансамбль выступатленыт. Алексей Алексеев шӱвырым шоктен да марла мурен, куштен.
MariEst дуэт да Piibar ансамбльлан, мылам, Макеевмытлан фестивальыш миен толаш окса дене Эстонийын родо-тукым калык-влак программыже полшен. Проектым программыш Чуваш тоштер гоч Анна Макеев возен, тудак корно да илыме вер сомылым вораҥдарен колтен.
MariUver
Фото: MariUver, Анна Макеев да моло
