Чапланыше марий композитор, «Акпатыр» икымше марий оперын авторжо Эрик Сапаевлан 2 сентябрьыште У Торъял посёлкышто памятник-бюстым почмо.
Ий-влак эртат, а айдеме нерген шарнымаш курымешлан кодеш. Марий семлызе Э.Сапаевын шочмыжлан шушаш ийын 80 ий темеш.
Тиде лӱмгечым сайын вашлияш манын, виктер кӱкшытыштак паша шукталтеш. Тений Э.Сапаев лӱмеш опер да балет театрыште «Акпатыр» оперын премьерыже лийын. Шушаш ийым Э.Сапаевын идалыкше семын увертараш палемдыме. А ынде теве эше ик кугу паша ышталте.
Шарныктыш-бюстым республикысе «Наследий» лӱмын ыштыме программе кӱшеш ямдылыме. Тидлан 300 тӱжем теҥге окса ойыралтын. Той гыч велыме бюстын авторжо скульптор-влак Российын сулло сӱретчыже Анатолий Ширнин ден Марий Элын сулло художникше Сергей Яндубаев улыт.
Памятникым почмашке калык шуко погынен. Саламлаш толшо-шамыч коклаште Марий Эл виктер вуйлатышын алмаштышыже, тӱвыра, печать да калык-влакын пашашт шотышто министр Михаил Васютин, Кугыжаныш Погын председательын алмаштышыже Анатолий Иванов, У Торъял район администраций вуйлатыше Василий Блинов, Э.Сапаев лӱмеш опера да балет театрын сылнешке вуйлатышыже, Российын сулло артистше Константин Иванов, композитор Э.Сапаевын пелашыже Луиза Сапаева, эргыже Андрей Сапаев, чапланыше дирижёр, Россий сымыктышын сулло еҥже Гавриил Таныгин да молат лийыныт.
Шарныктышым почмо церемонийым сылне сем сӧрастарен. У Торъял посёлкысо Э.Сапаев лӱмеш йоча искусство школын туныктышыжо-влакын ансамбльышт муро пӧлекым ыштыш. Чапланыше марий флейтызе, Российын сулло артистше Виталий Шапкин семлызе Э.Сапаевын «Торъял сем» произведенийжым шергылтарыш. А опер мурызо, Марий Элын калык артисткыже Светлана Сушкина Э.Сапаевын «Изи тул» романсшым пӧлеклыш.
Тиде бюстым ямдылымаште кугу надырышт — У Торъял кундемеш шочын-кушшо вуйлатыше еҥ, Марий Элын тӱвыра министржын алмаштышыже Сергей Домрачевын, район вуйлатыше В.Блиновын, У Торъял район администрацийын тӱвыра, капкультур да спорт пӧлкажым вуйлатыше Людмила Лебедеван, Йошкар-Оласе У Торъял землячествым вуйлатыше В.Наумовын, У Торъял посёлкысо Э.Сапаев лӱмеш йоча сымыктыш школын директоржо Нина Самсонован да шукын молынат.
Шарныктышлан верымат моткоч келшышым, йоча сымыктыш школ лишне ойырен налыныт. Композиторын пелашыже Луиза Фёдоровна тиде памятник-бюстым почмаште кугу надырым пыштыше кажне еҥлан чон гыч лекше тау мутшым каласыш. «Эрик Никитич моткоч тыматле койыш-шоктышан, кугу талантан, пашам йӧратыше, шонымашке шуаш тыршыше айдеме ыле. Тек чыла тиде койышшоктыш самырык тукымынат лиеш. Тек кугу сеҥымашке шуыт», — каласыш Луиза Фёдоровна. Эрик Сапаевын образшым почын пуэн кертмыштлан тудо скульптор-шамычланат тауштыш. Сӱретче, скульптор С.В.Яндубаев шарныктыш-бюстым почмашке шкежат уло кумылын толын ыле.
Памятникыште возымо: «Эрик Никитич Сапаев (1932-1963). Марийский композитор, создатель первой марийской оперы «Акпатыр».
Тыште — У Торъял кундемын веле огыл, пӱтынь Марий кундемын сылне верже. Тышке шуко еҥ толедаш тӱҥалеш.
Тиде кечын эше ик кугу мероприятий лие. У Торъялыште Э.Сапаевын лӱмжым нумалше йоча сымыктыш школлан — 50 ий. Культур министр М.Васютин, Кугыжаныш Погын председательын алмаштышыже А.Иванов, Марий Эл Республикысе тӱвыра пашаеҥ-влак профсоюз рескомым вуйлатыше Владимир Ушнурцев, Марий Эл Композитор ушемым вуйлатыше, Россий искусствын сулло еҥже Валерий Кульшетов, Йошкар-Оласе У Торъял землячествым вуйлатыше В.Наумов, Иван Палантай лӱмеш тӱвыра да сымыктыш колледжын директоржо Алексей Клёнов да шукын-шукын молат лӱмгече дене саламленыт. Саламлымашан телеграммым Россий Кугыжаныш Думын депутатше Лариса Яковлева колтен.
Сымыктыш школ сай лектыш дене пашам ышта. Тудын вуйлатышыже Н.Самсоновалан «Россий культурын сулло пашаеҥже» чап лӱмым пуаш Россий президентын Указше лектын. Искусство школын туныктышыжо О.Окунева «Марий Эл тӱвыран сулло пашаеҥже» чап лӱм дене палемдалте. Марий Эл виктерын, Кугыжаныш Погынын, Марий Элын Тӱвыра, печать да калык-влакын пашашт шотышто министерствыжын, Марий Элысе культур пашаеҥ-влакын профсоюз рескомыштын, У Торъял район администрацийын Чап грамотыштым туныктышо-шамычлан кучыктымо.
Сымыктыш школын коллективше чапле концертым ончыктен.
Юрий Григорьев
Налмывер: «Марий Эл» газет
Фотосӱретлаште: Музыкчо-туныктышо Л.Сергеева, дирижёр Г.Таныгин, композиторын пелашыже Л.Сапаева, эргыже А.Сапаев, тыгак А.Иванов, М.Васютин, В.Блинов — Э.Сапаевлан памятник-бюстым почмо годым;
Российын сулло артистше В.Шапкин шокта. С.Яндубаевын фотожо.
MariUver 