Орлыкан ӱмырым илыше марий писатель

2 июньышто Свердловск область, Арти районысо Ондрий Ялыште (Андраулышто) кугу пайрем эртен. Тыште верысе калык да уна-влак марий писатель Алексей Эрыканын шочмыжлан 100 ияш лӱмгечыжым палемденыт.

Тудо марий лудшо-влаклан «Кучедалме тулеш» (1958), «Чолпан Иван» (1966) романже-влак, «Фронтовик-влак» повесть да ойлымаш сборникше дене сайын палыме. Землякыштым, Алексей Николаевич Семенов-Эрыканым, шарналташ верысе калык веле огыл, Свердловск область гыч моткоч шуко еҥ миен. Марий Эл гычат кум еҥан делегаций пайремыште лийын.

Пайремым почмеке, марий серызын лӱмгечыж дене погынышо калыкым Арти район администрацийым вуйлатыше В. Кожев, КСП директор М. Батуев, районысо тӱвыра управленийым вуйлатыше Н. Шатохина, Екатеринбург оласе «Автоаудио центр» компанийын озанлык ужашыжын вуйлатышыже С. Митькин саламленыт. Йошкар-Ола гыч Марий тӱвыра рӱдерын пашаеҥже Л. Сидоркина Марий Эл Республикын тӱвыра, печать да калык-влакын пашашт шотышто министрже М. Васютинын пайрем лӱмеш колтымо саламлыме шомакшым лудын пуэн.

Палемден кодаш уто огыл: Сергей Митрофановичын полшымыж денак А. Эрыканлан пӧлеклалтше «Орлыкан ӱмыр» книга савыкталт лектын. Тудыжым Марий Элыште илыше марий краевед, журналист Гельсий Зайниев ямдылен. Торжественный ужаш деч вара книган презентацийже лийын.

Свердловск областьысе чыла район гыч гаяк Ондрия Ялыш мийыше коло ик фольклор коллективын кугу концертше моткоч сылне да оҥай ыле. Кажне фольклор ансамбль шкешотан, репертуарыштат поян да ойыртемалтше.

Пайремлыше-влак тидын дене гына серлаген огытыл. Алексей Эрыканын илышыже да творчествыже дене кылдалтше викториныште кажныже кумылын участвоватлен, йодышлан чын да раш вашмутым пуаш тыршен. Марий писательын землякше-влак тудын илыш-корныжым, мутсаскажым удан огыл палат улмаш.

Кастене пайрем марий дискотека дене мучашлалтын.

***

Палдарена: 10 июньышто Санкт-Петербургышто да Ленинград областьыште илыше марий-влак «Агавайремым» да «Пеледыш пайремым» эртарат. Тушкат Марий тӱвыра рӱдер шке пашаеҥже ден специалист-влакым колта. Мария Соловьева кушташ да Лариса Сидоркина мураш туныктымо шотышто мастер-классым эртарат.

10 июньыштак Киров область, Яраҥ районысо Марий Ошай ялыште «Пеледыш пайрем» эртаралтеш. Тушко Марий тӱвыра рӱдерын пашаеҥже-влак да «Марий памаш» ансамбль каят.

Галина СИДОРКИНА,
Василий СЕМЕНОВ

Марий тӱвыра рӱдер

Оставьте комментарий

Filed under Увер-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s