Тений шошым Марий Элын калык артистше Андрей Андрианов шкенжын 70 ияш лӱмгечыжым палемдыш.
А тидлан пӧлеклалтше касым Марий самырык театр 10 ноябрьыште эртарыш. Калыклан «Чодыраял Элыксандр» (Т.Минуллин) шӱлыкан комедийым темлыш. Тушто тӱҥ рольым Андрей Андрианов модо.
Шындык* деч вара тудым лӱмгечыж дене родо-тукымжо, йолташыже, землякше, студентше-шамыч саламлышт. Эсогыл шочмо Пошкырт кундемже гыч Мишкан район администрацийым вуйлатыше В.М.Андреев толын ыле. «Моткоч тале артист улыда. Тендан дене кугешнена. А мый шочмо кундемда гыч кугу саламым конденам»,- пелештыш тудо.
Спектакль шӱлыкын пытыш: Андрей Андриановын геройжо, колымашым ондален кертде, ош тӱня дене чеверласыш. А чынжым гын ты пагалыме айдемын ӱмыржӧ тек кужу да пиалан лиеш.
«Марий Эл ТВ»-н Андрей Андриянов нерген видеосюжетше:
И.Степанова
И.Степанован фотожо
Налмывер: «Кугарня» жаплышташ
* шындык — постановко
MariUver 