Ынде 18 ий почела курык марла мурышо-влакым «Мыры» эстраде муро фестиваль-конкурс шке йырже чумыра.
У ий вашеш Курык марий районышто илыше калыклан тиде — моткоч кугу пӧлек да пайрем. Калыклан веле огыл, тыгак поэт, композитор-шамычланат. Цикмäште гала-концерт южгунам кок-кум кече почела аншлаг дене эрта. Калык шке мурыжым, тӱвыражым тынар чот йӧрата. А февральыште тыгаяк концерт Йошкар-Олаште калыкым пога.
Ты конкурс деч вара «Аяр», «У сем», «Кырык сир» ансамбль-влакым шукын йӧратен шынденыт. Гран-прим тӱрлӧ жапыште М.Широбокова, С.Коротков, Т.Толстова, Е.Никтина, З.Юшкина да молат сеҥен налыныт. Ты мероприятий ятыр у лӱмым почын. Палемдыман Николай ден Леонид Айдаркинмытым, М.Кудряшовам, И.Юшкинам, Н.Савиновам да молымат.
Ты пайрем сайын эртыже да калыклан келшыже манын, организатор-шамыч сай деч сай мурым ойырымо дене гына огыт серлаге, тыгак кажне гана сценым вес семын, ӧрыктарышын сӧрастараш тыршат. Мурызо-шамычлан у вургемым ургаш темлат, чапле сценарийым возат.
Палемдыман режиссёр Н.А.Хватым, сценарист А.И.Смирновам, аранжировщик С.Д.Коротковым, йӱк режиссёр И.Н.Капустиным, тул шотышто режиссёр Е.В.Частушкиным. Садлан «Мыры» пайремым чылан йӧратат. Ӱшанена: тудын ӱмыржӧ кужу лиеш.
Фестиваль нерген «Марий Эл ТВ»-н видеосюжетше:
Н.Иликова
Налмывер: «Кугарня» газет
MariUver 