Александр Речкин: «Йӱдвелыш каенам гынат, садак тыштак улам»

rechkinКодшо рушарнян Йошкар-Олаште, Ленин лӱмеш тӱвыра полатыште, Александр Речкинын концертше лийын. Сашан шочмо мландышке толмыж дене пайдаланен, тудын дене Марий Элыште лийме пытартыш кечынже вашлийын мутланышна.

— Саша, тый шукерте огыл гына концертым эртаренат ыле. Теве адакат шке мастарлыкетым ончыкташ калыкым чумыренат. Мöҥгышкет толмо еда кажне гана калык ончыко лекмет мо дене кылдалтын: у муро-влак улыт, ойлышаш шомакет шуко погынен, оксам ышташ шоненат але эше иктаж вес амал дене?

— Мый Самарысе тӱвыра да сымктыш академийыште эстраде артистлан кумшо курсышто заочно тунемам. Мут толмашеш, тудым авамат пытарен, кызыт шӱжарем туштак шинчымашым пога. Тиде жапыште лачак сессийыште лийынам. Но эше тудо тӱҥалме деч икмыняр кече ончычак Курык марий районышто кок кечыште ешем дене куд концертым ончыктенна. Сессий пытымеке, ты районышто эше кум концертым эртаренна. Пытартышлан 12 апрельыште Йошкар-Олаште соло концертем лие. Чынак, тышке  толмем еда Марий Элыште мый шкетын але еш дене концертым ончыктена. Тиде ынде йӱлашке савырнен манынат кертам. Кызыт пеленем вич ияш эргымым конденам ыле. Тудат сценыш лектын. Изишак вожылмыжлан кöра огеш муро, но калык ончылно лияшыже келшымыла чучеш.

У муро-влак нерген ойлаш гын, кызыт икмыняр курык марий мурым возенам. Тыгак Надежда Пашкина, Роза Искакова мыйын келыштарыме мурым йоҥгалтарат. Шканемже ала-молан возен ом керт. Тидлан эше жап шуын огыл, очыни.

— Икымше концертыштет тый экраным кучылтынат, видеосӱретым ончыктенат. Ты гана нимо тыгай лийын огыл. Молан?

— Тидлан йöршынак жапем лийын огыл, сандене ямдылалт шуктен омыл.

— Марий Элыште тый чапланен шушо мурызыш савырненат ыле. Тугеже могай амал дене тышеч тыгай тора кундемыш, Йӱдвелыш, каенат?

— Икана мутланен шинчыме годым пелашем ойла: «Айда,  Йӱдвелыш илаш каена». «Йöра, айда каена»,- келшышым мыят. Но тушко каенам гынат, тышке толын коштам, сандене тыштак улам манашат лиеш.

— Тушко каяш шкендын кумылет огеш лий гын, садак кодаш могай-гынат амалым муат ыле дыр?

— Тидыжат уло. Но мыйын постоянный манме верыште пашам ыштымем шуын, а тыште тыгай лийын огыл. Шонаш гын, муашат лиеш ыле дыр, но тыште шукынжо мыйым шӱдыр семын ончат, сандене пашам ышташ нелырак. А тушто тыйым иктат огеш пале,  сандене пашам ышташ куштылгырак. Тушто угыч пагалымашым сулен налман. Икманаш, чыла угыч тӱҥалман, а тидыже сай гына. Адакшым тушто кажне айдемым аклен моштат. Мыят Нижневартовск олаште культур полатыште пашам ыштем да кӱлешан пашаеҥ улмем чынжымак шижам.

— Тугеже шочмо элышке пöртылаш шонымашет уке?

— Мый Марий Элыш чӱчкыдынак толын коштам. Кум тылзылан ик ганаже садак лиям, сандене утыждене йокрокланем да мöҥгеш пöртылаш чот шонем манын каласенжак ом керт. Но кунам Марий Эл гыч артист-влак тушко толыт, паледа, чонлан кузе чот сайын чучеш?! Тиде вет мемнан-влак улыт! Теве Светлана Дмитриева ден Влад Николаевын мийымышт годым концерт-влак кузе эртышт! Тушто марий общество уло. Тудым мылам вуйлаташ ятыр гана темленыт. Но тек лучо утларак палыше вес еҥ вуйлата, а мый документ-влакым ышташ полшем манын ойленам.

— Вес гана толмет годым адакат концертым ончыктет?

— Кеҥежым такше концерт-влак огыт лиеде, сандене шоналтем. Кызытеш Марий Эл радион пайремышкыже мураш толаш палемденам.

Любовь Камалетдинова
мутланен.

М.Скобелевын фотожо

Налмывер: «Марий Эл» газет

Оставьте комментарий

Filed under Артикль-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s