Интернетыште кугу марла мутер лиеш

Эрик Юзыкайн21 апрельыште Йошкар-Олаште марла-рушла, рушла-марла лу томан электрон мутер ямдылалташ тӱҥалын. Тиде паша могай шонымаш дене ышталтеш? Мутерым ямдылымаште кöмыт тыршат? Тиде да икмыняр моло нерген Марий Эл Республикысе Тӱвыра, печать да калык-влакын пашашт шотышто министерствын калык-влак кокласе кыл пöлкажым вуйлатыше Эрик Юзыкайн дене мутланышна.

— Эрик Алексеевич, мутерым ышташ шонымаш кунам шочын?

— Тыгай шонымаш шукертак лийын, молан манаш гын чылан умылат: тыгай мутер кӱлеш. Адакшым марла-рушла лу томан мутер раритетыш савырнен шуын. Нылымше деч варасе том-влакым налаш муаш неле ыле. Мый шкежат библиотекышкем нуным кугу оксалан налынам. Но амалже тиде гына огыл. Мутерым электрон форматыш кусарена гын, тудын дене пайдаланаш утларак йöн лиеш. Тыге гын, шукырак еҥ тудым кучылт кертеш. Тиде мутер — моткоч кугу поянлык. Тушко мут-влак гына огыл пурталтыт, эше тӱрлö книгала, произведенийла гыч цитата-влак лийыт. Тыге гын, кӱлеш лийше ойсавыртышым писын кычал муаш йöн почылтеш.

Мутерым ышташ ойым Одо Республика гыч Виталий Грахов ден Татарстанысе Менделеевск район гыч Вячеслав Килеев пуэныт. Нуно марий улыт, но марла мутланен огыт мошто, моткочак тунемнешт. Санденак Зиновий Васильевич Учаевын мутержымат электрон формыш кусареныт. Ынде тудын дене Интернетыште пайдаланаш лиеш. Марий калыклан тыгай кӱлешан пашам ыштымыштлан нуным ончыкыжым иктаж-кузе палемдашат лиеш дыр. Но ме эше кумдарак пашам ыштынена да мутым рушла гыч марлашкат, марла гыч рушлашкат кусараш тӱҥалына. Тиде мутерым ыштыме дене марий йылме деке утларак еҥым кумылаҥдена, шонена.

Тиде пашашке Марий шанчын шымлыше институтын икмыняр пашаеҥже ушна, молан манаш гын мутерын авторжылан ты учреждений шотлалташ тӱҥалеш.  Нине пашаеҥ-влак корректор пашам шукташ тӱҥалыт. Лу томге лудын лекмекышт, тергымекышт, йоҥылыш уке манын, тамгам пыштымекышт гына пашам умбакыже шуена. Кызытеш мутерым пӱчкедена, вара сканироватлена, умбакыже компьютер программым тиде материалым «умылаш» туныктена. Тылеч вара сканироватлыме да «умылымо» материалым компьютер электрон форматыш кусара. Ончыкыжым нуным электрон книга семын савыкташ шонымашна уло. Тиде эше мутер огеш лий, но тудын дене пайдаланаш йöн пуалтеш. Вараже электрон форматыш савырыме материал негызеш программым возена.

— Мутерым ямдылыме паша кöн кӱшеш эртаралтеш?

— Мутерым ямдылаш грантым Марий Эл Республикысе Тӱвыра, печать да калык-влакын пашашт шотышто министерстве ойырен, тыгак Эстонийысе родо-тукым калык-влак программе окса дене полшен.

— Мутерым могай жаплан ямдылен шукташ палемдалтеш?

— Паша шонымо семын кая гын, тений идалык мучашлан ямдылен шукташ тыршена.

Тиде темыланак “Марий Эл ТВ”-н видокаласкалымашыже:

Любовь Камалетдинова
мутланен

Налмывер: «Марий Эл» газет

Оставьте комментарий

Filed under Артикль-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s