Мӱшкыр кучен воштылаш таратат (ВИДЕО)

voshtylashАйдеме воштылде илышаш огыл! Мыскара кумылан еҥын ӱмыржат кужу лиеш. Очыни, айдеме шке илышыштыже кочо да неле пагытла дене ынже кӱэмалт манынак, 1 апрельым Воштылмаш кечыш савыреныт. Ты кечын кеч-мыняр еҥым порын ондалаш, мыскарам ыштышыла, тупела ойлышташ, ӱнар пытымеш воштылташ да шкежат шинчавӱд лекмеш утен каен воштылаш лиеш.

Кажне ийын «Кугарня» газет редакций Марий Элыште илыше калыклан, тыгак уна-влакланат чон дене каналташ йӧным ышта. Тиде гана воштылчык-ондалчык пайрем 28 мартыште Сеҥымашын ХХХ идалыкше лӱмеш тӱвыра полатыште эрташ тӱҥалеш. Эше тыглай гына мыскара кас огыл – латвизымше – лӱмгече шотан.

Пӱсӧ умдан мыскарам вучена!

Мыскара касын темыже-влак шотышто шуко мутланымаш, каҥашымаш деч вара тыгай ойым пидынна: выступатлыше-влаклан аракам йӱмаш, «шола могырыш коштмо паша» деч кораҥаш тыршыман. Посна тема-влакымат палемденна ыле. Теве тыгайрак нуно улыт:

  • «Мый Российын патриотшо улам»;
  • Россий кӱкшытысӧ актуальный тема (ипотека йодыш, школ деч вара вузыш тунемаш але пашаш пураш тӧчымаш; еш илыш; ялысе илыш; озанлык паша; демографий йодыш да тулеч молат);
  • кумдан палыме марий але Россий кӱкшытан мурылан пародийым муралтымаш.

Конкурсыш кумылан чыла марий еҥ ушнен кертеш. Номер вич-лу-латвич минут шуйнышаш. Кужужо ончышым нойыктара веле. Тӱҥжӧ – выступлений марий калыкнам лапкаҥдышаш огыл, лач кумылнам веле нӧлталшаш! Сандене сайын гына ямдылалтса да шке номердам редакцийыш але Марий тӱвыра рӱдерыш толын ончыктыза. Икманаш, ида юватыл. Вет шукыж годымпашадам режиссёр тӧрлаташ: иктаж-мом ешараш, вашталташ – ойла. Угыч шонен лукташат, сценыште шкем кучаш тунемашат жап кӱлыт. «Воштылаш, товатат, сулык огыл!» конкурсышто сеҥыше радамыш логалнеда да шергакан пӧлекым налнеда гын, кызытак шкем шуараш тӱҥалза да тидын нерген «Кугарня» газет редакцийыш увертарыза.

Воштылчык кас кӧм ушен?

Марий калык – мыскараче калык. «Воштылаш, товатат, сулык огыл!» конкурс деч посна пытартыш жапыште шкенан КВН командына-влак шочыч, икмыняр кундемыште – мыскара группо. Кӧ кузе шона гынат, а ме палена – чылажат «Воштылаш, товатат, сулык огыл!» конкурсна гыч тӱҥалын.

Икымше мыскара кас М.Шкетан лӱмеш Марий национальный драма театрыште 1994 ий 1 апрельыште эртаралтын. Тунам икымше вер пуалтде кодын. Жюри вуйлатыше Геннадий Копцев манмыла, «тӱҥ призше – автомобильже – Моско гыч толын шуын огыл». А кокымшо вер «Мик-Мек» мыскара ансамбль ден Пошкырт вел марий Эдуард Байгазовлан логалын. «Мик-Мек» тунам чиян телевизорым солалтен, а Эдуард магнитофоным налын, шкенжын Мишкан районысо Кугу Шогертен ялышкыже кудалын. Кумшо верыш лекше ача ден эрге Олег ден Саша Логиновмыт велосипедым кушкыж каеныт. Тиде – икымше пайремын чолга артистше-влак!

Чынжымак, Воштылмаш кечылан пӧлеклалтше мыскара касна Марий Элысе ятыр мыскараче еҥым ушен. А Пошкырт кундемын чолга рвезыжын – Эдуард Байгазовын – икымше конкурсышкак ушнымыжо да сеҥыше радамыш логалмыже историеш возалт кодын.

Историй йогыным рончаш гын, ужына: вес ийынже «Воштылаш, товатат, сулык огыл!» мыскара пайрем Республикысе курчак театрыште кок кече(!) каен. Шке мастарлыкшым тунам 18 участник ончыктен. Кумшо вер дене Марий самырык театрын актрисыже (а кызыт Марий Элын сулло артисткыже) Светлана Никитина палемдалтын, кокымшо дене – артистка Августа Романова (!), а икымше дене – Юрий Григорьев (журналист) ден Владимир Юдин (тунам артист корным тошкаш тӱҥалше гына).

1996 ийыште тыгай кас тӱрлӧ амаллан кӧра эртаралтын огыл. 1997 ий 2 апрельыште «Кугарня» газетын, «У вий» ушемын, Республикысе тӱвыра ден сымыктыш колледжын, Марий радио ден телевиденийын полшымышт дене Йошкар-Олаште кумшо конкурс лийын. Южышт шарнат дыр тиде касым – тунам конкурсым йыргешке шӱргывылышан Вячеслав Кольцов ден «Марий Эл» газетын Пампалче гай пашаеҥже Светлана Носова вӱденыт. Икымше вер Морко театрын режиссёржо Анна Якушевалан шыргыжалын, кокымшыжо – мыскара мурым шергылтарыше Виктор Комаровлан, кумшыжо – Волжский район Карай тӱвыра пӧртын тунамсе директоржо Виктор Якимовлан.

1998 ий гыч конкурс Ленин лӱмеш тӱвыра полатыште эрташ тӱҥале. Калык шыҥ-шыҥ погына, мыскара деке утыр лишемеш. Тиде полат шыгыр лие. Тений кумшо гана Сеҥымашын ХХХ идалыкше лӱмеш тӱвыра полатыште эртарена. Тушто шукырак еҥым куандараш йӧн уло.

Конкурсна сценыште 15 ий калыкым мӱшкыр кучен воштылаш тарата. Садлан икмыняр лӱм дене гына серлагаш ок лий: мыскараче-влак моткоч шукын улыт. Пытартыш лу ийыштат конкурсыш ушнышо чолга ӱдыр-рвезе-влакым каласен кодыман. Тиде – Торъял кундем гыч Олеся Блинова, Иван Алметьев, Нина Гребнева, Морко кундем гыч Инна Андреева, Алик Андреев, Якушевмыт еш, «Пулдырчо» группа, Волжский вел гыч Василий Кусков, Александр Якимов, Александр Егоров, Алевтина Чернова, Анатолий Сапаев да тудын тунемшыже-влак, Советский район гыч Вера Петухова, Валентина Ефремова, Вера Мочаева, Параньга велым Вениамин Захаров, Йошкар-Ола гыч Сергей Карпов, Наташа Пушкина… Тышке эше икмыняр лӱмым ушаш лиеш. Ончыкыжымат чолга да мыскараче калыкна ынже шагалем манын тыланена да конкурсыш ӱжына.

Вашкыза! Артист койышым койын моштышыжо – сценышке, молыжо – залышке! Ты ганат мыскара конкурсышто чапле пӧлекым кучыктат. Могай пайрем марла мурымаш-куштымаш деч посна?! Артист-влакат кумылдам нӧлталыт!

«Марий Эл ТВ»-н «Воштылаш, товатат, сулык огыл!» конкурс нерген видеосюжетше:

Эльвира Ендылетова

Налмывер: Кугарня

Фотосӱретым «Марий Эл» да видеом video.vmariel.ru гыч налме

1 комментарий

Filed under Артикль-влак, Видео

One response to “Мӱшкыр кучен воштылаш таратат (ВИДЕО)

  1. мыскараче

    Эх тольык кузе Геннадий Копцев нолтал коден, чыла туштак гына шога. Ни туды, ни суды… А темыже икте гына арака, тамака и…. лийын кертеш, весе нерген ойлен ончал. Тыйым огыт умыло а шукырак ойлет мангаш логалеш

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s