Кок марий радио ӱчаша — калык орлана

romanova_dmМарий муро нерген мутым лукмеке, ушышко марий сылнымутчо-классик Сергей Григорьевич Чавайнын курымашлык чын шомакше толын перна: «Кеч мутшым нал, кеч семжым нал — яндар шöртньö». Тыгай шöртньö чон поянлыкна уло гын, тудо калыкнам пойдарышаш, чапландарышаш.

Таче марий сем тӱняште, сымыктышыште* ик йодыш утларак да утларак пӱсын палдырна, тудым тарватыде кодаш нигузе огеш лий. Илыш ончыко кая, вашталтышым пурта. Икмыняр ий ончыч «Марий Эл радио» шочмо дене республикысе калык у шулдырымак нале, манаш лиеш. У радиом йöратен колыштыт, чоныштым лыпландарат. Но илыш тöр корно да ош тӱс гына огыл, маныт. Уло гын сайже, лектеш тöрсыржат.

Шукерте огыл «Марий Эл» газет редакцийышкына серыш пурыш. Авторжо — мемнан шукертсе лудшыеҥна, Провой кундем гыч Геннадий Павлов. Геннадий Павлович воза: “Мемнам, Провой велыште илыше марий-влакым (шочмо Морко велышкем унала мийымекат, ты йодышым тарватеныт ыле), теве мо тургыжландара: «Марий Эл радио» ала-молан кодшо курымын 60-90-шо ийласе мурызо-влакын мурымыштым эфирыш пеш шагал луктеш. Иктешлен ойлаш гын, ончычсо, илалше мурызо-влакын мурымышт тушто огешат йоҥгалт, манаш лиеш. Теве Марий Элын калык артисткыже Елизавета Коновалова могай сылне мурым мура. Но пеш шуэн эфирыште колына. Адак «Эрвел лыве» да «Эрвел лывын вашмутшо» мурым пеш колыштмо шуэш. Марий калыклан Юрий Васильевын мурен кодымо мурыжо, такмакше-влак йоҥгалтыт гын, сай гына лиеш. Тудын мурыжо чоным тарвата. Мурыжо архивыште уло, а эфирыште уке. Светлана Сушкинам, Майя Романовам, Леонид Красновым да молымат эфирыште колышташ кумыл йодеш.

Теве Моркышто илыше туныктышо-пенсионерка Анна Павловна Кудряшова манмыла, мемнан жапысе муро-влак илаш, пашам ышташ, чын йöратымашым аралаш, сай-поро койышан лияш таратыше улыт. Нуным колыштат — лас­калыкым шижат. Садлан эфирышкат чӱчкыдынрак лукман. Тачысе самырык мурызо-влакымат орлаш ок лий, но нунын мурышт кызыт пеш чӱчкыдын йоҥга. Южыжо — кечылан кум-вич гана. Эре ик кочкыш кульыманда, мурат шерым тема. Сандене, ала мемнан ойым колыштын, калыкын йöратыме ончычсо муро-влакым «Марий Эл радио» эфирыш лукташ тӱҥалеш да мемнам, илалше-влакым, эше чотрак куандара”.

Тыгеракын иктешла серышыжым лудшыеҥ. Йодышым шокшынек да чын шындыме. Садлан рашемдаш кӱлешак.

Тиде йодышыжо теве мо дене кылдалтын: «Марий Эл радио» але икмыняр ий ончыч веле шочын. Тудо самырык. Садлан фондыштыжо пытартыш ийласе муро-влак «озаланат». А ожнысо муро-влакым чумыраш манын, мемнан ынде кугу ийготан Марий радион полышыжлан эҥертыман. Лач тыштыжак умылыдымаш пеш раш палдырна.

«Марий Эл радио» — посна организаций. Ондакше тудо «Пульс радио» пелен лийын. Марий Эл виктерын* пунчалже дене тений тудо посна тӧнежыш* савырнен. Негызлыше* — Марий Элын Тӱвыра, печать да калык-влакын пашашт шотышто министерствыже.

У марий радион фондшо шотышто йодышым рашемдаш ме тусо сем редактор Андрей Чемышев деке мийышна. Чыла муро, сем произведений да молат тудын компьютерыштыже аралалтыт.

— Ме тыште 2005 ий гыч фондым чумыренна, — ойла Андрей Чемышев. — Утларакше — кызытсе эстрада. Садлан «Марий Эл радио» дене ончычсо марий муро, радиоинсценировка, радиоспектакль-влакым йоҥгалтараш темлымашым мыят чынланак шотлем. Меже торешат онал. Но…

Эше кок ий ончычак «Пульс радио» ЗАО-н директоржо Александр Курмузаков ВГТРК-н «Марий Эл» кугыжаныш телерадиокомпаний» филиалжын директоржо Владимир Оленёв лӱмеш серышым возен. Тушто лач ты йодыш тарваталтын. Марий радион фондшо гыч муро, спектакль-влакым радиофондышкына пуаш йодынна. Вет тудо калыкын погыжо. Но отказым налме. Вара Марий Эл виктер вуйлатышын алмаштышыже Михаил Зиновьевич Васютин ты йодышым Владимир Иванович Оленёв ончылно тарватен. Адакат — отказ. Оленёв каласен: «Ме ВГТРК-н «кид йымалныже» улына. Озаже — Моско, садлан фондысо материалым пуэн она керт».

pushkina«Марий Эл радион» пашаеҥже-влакын калык деке лекташ йöнышт пеш кугу. Куд шагат эрденак тӱҥалын латик шагат йӱд марте эфирыште улыт, манаш лиеш. Эше 23.00 шагат гыч 6 шагат эр марте — йӱд эфир. Туштат му­ро дене веле огыл серлагаш, марий спектакль­ымат колташ йöн уло. Пӱтынь республикыште, эше Чувашийыште, Татарстаныште, Киров областьыште да моло кундемыштат тиде радиом колыштыт.

— Калыкыштыже шонат, пуйто ме ончычсо муро-влакым лукташ тореш улына, — умбакыже радамла А.Чемышев. — Тиде чын огыл. Мемнан шонымашна уло — марий сем тӱвырам чапландараш. Палантайын, Эшпайын, Сапаевын да моло композиторын семыштымат калыкыш луктын кертына. Тидыже калыклан, самырык тукымым культурылан шӱмаҥдымаште пайдале лиеш огыл мо?

«Марий Эл радион» фондыштыжо ончычсо икмыняр муро уло. М.Шкетан лӱмеш театрын режиссержо Алексей Ямаев «Каче-влак» спектакльжылан ончычсо муро-влакым радиофонд гыч мини-дискыш возен налын. Тудо записьым у радиош пуэн. «Молан тудо тыгай?», «Шонанпыл», «Эрвел лыве», «Канде шинча» да молат ынде «Марий Эл радион» эфирыштыже йоҥгалтыт. Но тиде шагал.

– Шылтыде каласаш гын, тыге лектеш: «Марий Эл» ГТРК»-лан «Марий Эл радио» — конкурент. Тидын денат кылдалтын, — ойла Марий Элын Тӱвыра, печать да калык-влакын пашашт шотышто министерстве гыч “Марий Эл радион” кураторжо Эрик Юзыкайн. — Мыйын шонымаште, чыла тиде аудиофондым республикысе посна мер фондыш кусарыман. Вет тудым Моско огыл, а республикын вийже дене чумырымо. Калыкланак лийже.

Марий радион фондыштыжо муро веле огыл, шагал огыл радиоспектаклят аралалтеш. А лӱмлö еҥ-влакын йӱкышт ынде Марий радиоштак веле аралалт кодын. Нунын коклаште Миклай Казаковым, Валентин Колумбым, Вера Смирновам да шуко молымат палемдаш лиеш.

Кодшо курымысо муро, спектакль, музыка, сылнымут фонд шотышто В.Оленёв тыгай шонымашым луктын каласыш:

— Чынжымак, «Марий Эл радио» самырык. Тудо у ошкылым ышта. Мыят йöн лийме семын колыштам, аклем: удан огыл тыршат. Но нунын рӱдыжö — самырык аудиторий. А кокла, кугу ийготан радиоколыштшо-влаклан ала-мо весе кӱлеш, утларак лишыл улыт ончычсо муро, радиоспектакль-влак. Но «Марий Эл радиолан» шкенан радиофонд гыч материал-влакым ме нигузе пуэн она керт. Вет чыла тиде — федерал пого*. Уло закон, тудым пудырташ огеш лий. Адакшым «налза» манын пуаш — тугеже кандашлу ияш, шке поро йӱлаж дене ойыртемалтше Марий радиом петыраш да пытараш. Шоналтет, да тидыже чонымак сусырта.

Вес шотшо дене пеш умылем: радиом колыштшо-влакын кумылыштымат шотыш налман. Садлан ме «Марий Эл радион» пашаеҥже-влаклан тыге темлена: мемнан радиофондысо материалым кунар шонат, тунаре эфирышкышт луктын кертыт. Но нине передача-влакым мемнан журналистна-влак ямдылышаш улыт. Эше каласем: тидлан ме «Марий Эл радио» деч оксам монь она йод. Можыч, журналист-шамычлан изишак гонорарым шынден кертыт. Тыге, нимогай законым пудыртыде, чыла шотыш кондаш йöн лектеш. «Марий Эл радио» дене кутырен келшыман. Чылалан сай лийшаш.

Мемнан кызыт фондысо муро, сем произведений-влак цифре форматыш пышталтыт. Тыге пеш шуко жаплан нуным аралаш лиеш. Фондын 40 процент­ше тыге уэмдалтын. Тидлан ме Марий Эл виктер деч республикысе бюджет гыч ик ырымат налын огынал. Чылажат шкенан коммерций кӱшеш ыштен налме окса дене шукталтеш.

Палемден кодынем: еҥ-шамыч мемнан Марий радиом колышт кертыт. Тидланже радиоприемникыште УКВ южтолкыныш логалман. «Российын радиожо» каналыште марий передачым колышташ лиеш. Кечылан кок шагат наре жап эфирыште ойыралтеш. Радиопередатчик-влак Йошкар-Олаште, Волжск, Звенигово, Козьмодемьянск олалаште, Советский поселкышто улыт. Республикыште шукын мемнан радиопередачына-влакым колыштыт. Серыш-влакат районла гыч пурат.

Конешне, Марий радиоштат сай передача-влак улыт. Но чаманаш логалеш, шуко жапшым увер-влак айлат. Эфир жап тушто садак шагал. Садлан В.Оленёвын темлымашкыже угыч пöртылмö шуэш. Калыклан пайдале лийже манын, Марий радион журналистше-влак, шöртньö фонд гыч материал-шамычым кучылтын, «Марий Эл» радиошто» передачым ямдылаш тӱҥалыт, а тусо пашаеҥ-влак тыге кöнат гын, моткоч пайдале ошкыл лиеш, очыни. Марий радион службыжым вуйлатыше Вячеслав Кольцоват тидлан тореш огыл. «Мемнан радион фондшо моткоч поян. Чапланыше артист-влакын йӱкышт дене возен кодымо «Салика», «Айвика», «У муро», «Мӱкш отар», «Акпатыр» да моло радиоспектакль-влак, муро-влак республикын «шöртньö фондшо» улыт», – манеш тудо.

Но «Марий Эл радиошто» ты шотышто эше раш вашмутым ышт пу.

А радиоспектакль-влак шотышто Э.Юзыкайн шонымашыжым посна радамлыш. «Ме лучо, театр гыч артист-шамычым ӱжын, ончычсо да кызытсе пьеса-влак негызеш у радиоспектакль-влакым возаш тӱҥалына. Тыге ыштымын пайдажым утларак шижам. Тидлан Марий Элын Тӱвыра, печать да калык-влакын пашашт шотышто министерствыже оксам ойырыжо манын, йодышым тарватыман», — мане Эрик Алексеевич.

В.Оленёв дене вашлийме годым тиде йодышымат тарватыде шым чыте: «Пытартыш ийлаштат марий театрлаште пеш шуко сай марий спектакль ончыкталтеш. Нуным телевидений фондышкыжо возен мо?» Вашмут тыгайрак лие: «Возен онал. Молан манаш гын йöн уке. Автор права йодышлан кöра чарак уло. Спектакльым телевиденийыш возаш гын, Пӱтынь Рушэлысе автор-влакын ушемыштлан* кугу оксам тӱлыман. Пеш шергыш шуэш. А мемнан, телевиденийын, автор ушемлан тӱлаш йöн уке».

Öраш веле кодеш. Тыге лектеш: пытартыш ийлаште ик марий спектаклят ны радион, ны телевиденийын фондышкышт возалтын огытыл. Вара мо историешыже кодеш?

Но мутланымеке пален нальым, шонымашышт тыгай: телевидений спектакльым возаш шке огыл театр деч йодшаш. А спектакль-влакым телевиденийыш возыкташ театр шке тургыжланышаш да шонышаш. Умылыдымаш тыштат шуко.

Калык тӱрлö, шонымашат тӱрлö. Но тиде статьяште нöлталме йодышна-влак чын вашмутым муыт да тöрсыр-влак кораҥдалтыт манын, моткоч ӱшаныме шуэш. Калык тидлан ӱшана. А калыкын ӱшанже нимо деч шерге.

Юрий Григорьев
Снимкыште: М.Т.Романова, А.Г.Страусова, М.С.Митрофанова — “У муро” спектакльыште (1964 ий)

(фотом редакцийын архивше гыч налме);
«Марий Эл Радион» вӱдышыжӧ Наташа Пушкина.

Налмывер: «Марий Эл» газет

*сымыктыш — искусство, виктер — правительство, тӧнеж — учреждений, негызлыше — учредитель, федерал пого — федеральный собственность, Пӱтынь Рушэлысе автор-влакын ушемышт — Всероссийский авторский общество

27 комментариев

Filed under Артикль-влак

27 responses to “Кок марий радио ӱчаша — калык орлана

  1. ЧЫНмари

    Да чылажат окса йыр пӧрдеш, кажныже шке кӱсенышкыже шукырак удыралаш тырша. Оленевшо да ВГТРК-же чыла тиде тошто марий мурым, спектакльым пуйто чыла шке оксашт дене возеныт, а мемнан налогым тӱлышӧ-влак окса дене огыл. «Марий Эл Радиожат» але мартат интернетыш лектын огыт керт, лӱдыт чай интернетыште лиеш гын кӧ колышташ тӱҥалеш манын.

  2. Опанас

    Пеш чын ойлет нигӧ пешыжак марий культур поянлыкнам марий калык дек шукташ ок тырше. Чылан тудо да кызытсе марий культур кӱшеш поен гына шичынешт.

  3. кайыккомбо

    Оленев чын кутыра — молан тудо 50-70 ий дене погымо поянлыкым КОММЕРЧЕСКИЙ (бизнескудо) Марий Эл радиолан пуышаш?..
    Мочаев ден Юзыкайн гай-влак пеш кызу улыт — руалтат да таумат ышташ мондат. Вара «Кольцовын радиожлан» товарвондым але ӱштервоштырым гына кучаш кодеш.
    Кольцовын радиожо Васютинын радиожо дене таҥасен ок керт — тӱрыс ончымаште. Вет Васютинын радиожо (тудак Юзыкайнын да Мочаевын радиожо) — тиде Маркеловын радиожо.
    Да мыланнаже, марий колыштшыжлан — могай разнице — Маркеловын тудо але Маркеловын огыл, просто пылышет лывыжга.
    А тиде радио — Васютинын радиожо. Васютин тудым Юзыкайн полшымо дене шонен луктын — министреш кодаш манын, уке гын, Маркелов тудым поҥгалтарен луктеш ыле. Васютин «истинный» семын тиде шӧрга гыч йӧным муын — Маркеловлан радиом ыштен пуаш, Маркеловын радиожо гоч Маркеловымак мокташ (шарнеда, кажне эрдене «тиде радио Марий Элын президентшылан тауштен…» манын тӱҥалмым) да тидын дене министр портфельым кид гыч мучыштараш огыл. А чын нерген кутыра мо тудо шкеже, «чиялтылеш» мо — да кӧн могай пашаже… Лишь бы удержаться! — вот девиз, достойыный чести произносившего.
    А Васютин йыр пӱтырнылшӧ-влак ЛЕГЕНДЫМ шонен луктыныт: Васютиным паша гыч Маркелов кораҥда гын, тунам марий културылан — крышко-0!!!
    Кӧ пала, ала чын улыт. Но тидын годымак Васютинын марий культурышто ыштыме эҥгекшым шотлен лукташ гын, «поро пашаже» «язык-сулыкшым» сула мо?
    Эше висен ончаш кӱлеш… кудыжо перетянет.
    Ну, тидым историйлан кодена.
    Да чамнена изишак Васютинымат — вет тудым кризис вуча. Кугу кризис.
    2-3 ий ончыч Маркелов эре кычкыра ыле — вот марий-влаклан полшена!
    Целый марий культурлан 3 млн. (!!!???…) — целых КУМ МИЛЛИОН тенгем ойыркаленыт.
    Иктыже гына ӧрыктара ыле — Озаҥыш каяш, шымлыме грантлан проектым пуэт Марий ушем лӱм дене — окса йывылдик. Уке. Оксам налашлан «Туан вел» але «Ош Виче» организацийыште лийман, по крайней мере, «У вийыште» (2005-2008 ийласыштыже). А «Марий ушем» але тунамсе Мер Каҥаш лӱм дене проектым серет — носом не выдался и лысины нет… Ок логал. Йӧра кеч Мер Каҥашыже икмыняр гана «сумел продавить». Но вет тиде икмыняр гана веле.
    Вот тыге ме илен эртарышна XXI курымын тӱҥалтыш 10 ийжым..

    Эше кок-кум ий тыгак илена гын, тунам Юзыкайн гайже Кольцов деч йодын шогашат ок тӱҥал.
    Йодышыжо икте веле — кӧжӧ кӧм да кунам…

  4. Радиом колыштшо

    Да кайккомбо такшым пеш чын кутырет.

  5. Марий

    Сай йодыш нӧлталалтын. Но кызытсе илышыже тугай — чыла автор права нерген тӧртык (закон) йыр пӧрдеш. Шукерте огыл мемнан совет жапысе ик эн сай, йӧратыме мультфильмна-влакым ончыкташ права йӧршын Америкысе фирмын гына лийын. Йӧра, шонем Путин темдалмыж почеш, ик поян тиде правам налын Российлан мӧнгешла пӧртылтен. Чынжымак ме тошто сай марий муро, спектакль-влакым калык деке шуктынена гын шонышаш улына ВГТРК пелен улшо Марий радион жапшым кугемдыме нерген. Кок тӱрыс виян радио лиеш гын, конкуренций кугырак, радиопередаче-влакын качествышт саемеш. А «Марий Эл Радио», калык нерген шона гын, Марий радион архившым налме нерген азапланышаш — тек кугыжаныш деч оксам йодеш, спонсор-влакым кычалеш. Але тек Марий радион темлымыж семын ӱжеш шке эфирышкыже «Кольцовын радиож» гыч еҥ-влакым передаче дене.

  6. Шонышо

    Кайыккомбо, Оленев чын кутыра манат?! ну-ну… Тый денет чыла раш!
    Могай эше «Кольцовын радиожо»?!
    Васютин, Оленев, Кольцов, Мочаев, Юзыкайн… Можыч сита, а?!
    Таче кечылан кок марий радио уло. Тиде кок тошкалтыш. Умбакыже тошкедыман. Ончыко кайман! Марий калык, марий йылме, марий культура верч шогыман! А те ваш пуредыл киеда. Намыс!

  7. лудшо

    шонышо, ончыко тиде кушко? ала ме тый денет тупынь шогена)))))) але тыйым кудо векла шӱргет ден шогалтеныт тушто ончыко? угагага.

  8. Шонышо

    лудшо, тылат эмлыше деке миен толаш темлем. ойлат вет, черым тыгак кодаш огеш лий, эмлыман…

  9. лудшо

    шонышо, утыжден шуко ойлет — сай огыл.))) ит сыре адакшым. но направленийым раш ончыктыман, уке гын тыйын тиде так чокым кычкырме мут «Ончыко». ала ончылнетше корем. сатлан тӱрлö шаблонный выраженийет воштылтара веле))) и эмлалташат шке миен тол. а такшым, ала тыйын целетше сайак? ом пале вет. могай тошкалтыш? кушко? мом тиде радиошто кутырат? культурынам кугемдат ала мöҥeшла ӱлык волтат? йодыш шуко уло. а тый ончыко манат. и эмоцийышке ида кусно, родем-шамыч.

  10. Шонышо

    лудшо, тый марла умылет уке?! )))

    Шонышо Says:

    16.03.2009 at 08:14
    …Марий калык, марий йылме, марий культура верч шогыман!..

    а тый, лудшо, витне руш генерал-шовинист сектант Петровын (КПЕ) айдемыже улат?

  11. лудшо

    а тый йодышлан йодышденак вашештет, чувак. умбакыже тый денет кутырымем ок шу. чеверын.)))))))

  12. Шонышо

    марла отак мошто, витне…
    мый марий калык, марий йылме, марий культура верч улам! Вот тиде мыйын направлением!
    а тый кӧн верч улат? руш генерал-шовинист Петров (КПЕ) верч?
    йодышемлан вашеште, укеж дык тыйын тыгак шотлан тӱҥалам! )))

  13. лудшо

    кузе мый генерал верч лийын кертам? аҥыргенат мо? мый тидым иктаж кушто серенам ыле? вот смайлик уке, атогын тыланет вуй пелен парня ден пӱтыршӧ колобокым колтем ыле.

  14. Петан

    Тыге уҥылышым: витне, «Шонышо» — Мочаев, «Лудшо» — Кольцов. Кок марий келшен огыда керт. А кузе кок коммерческий организация келшат? И нигузеат кок Радиом иктышке чумыраш ок лий, «калык орлана» манын, Кольцов фондшым шалата мо?

  15. Петан

    Ончалза, Музейым, экспонатым шалатымыжлан, прокуратура сургыкта. Тыштат тыге лийын кертеш…

  16. Опанас

    Иктым умылшым — ме марий-шамыч критикым йӧршын чытен огына керт, изиш шылтал ойлымыланат вик вуеш налына. Адакшым ӱчашенат огына мошто — пижына икте весым лӱмдылаш да мыскылаш. Тыгай койыш дене торашкак огына кай.

  17. Эрге

    А лӱмдылаш вет эре икте-шамычак тӱҥалыт.

  18. Эрге

    Парня дене ончыкташ огына тӱҥал.

  19. Cseremisz

    Кайыккомбо комбокайыкла ондакысе семынак чоҥештылеш. Умылаш, тӱткын лудаш каҥашаш тептерже огешак сите, витне.
    Кеч кузе: кеч Марий Эл Радиолан, кеч кугыжаныш архивлан, кеч шке тираж дене луктын оксала ужалышт, но кузе гынат калыкнан шӧртньӧ поянлыкшым калык деке намиен шуктыман. Калык тидын дене пайдаланышаш. Огыл мо?
    А «кӧ кӧм да кузе, да мыняр гана…» тидыже тендан гае-влакын эн йӧратыме теме, тушко мутланымашым виктарашлан кеч могай амал йӧра.
    Шотдымо!

  20. чын

    Тӱрыс чын

  21. Тура мари

    А мом вурседыл киедаже? Куаныман — кок радиона уло, моло финн-угор-влакын тидыжат уке! Могай ойыртем кӧ почын да кӧн радиожо, «Марий Эл радиоштат» марий чонан еҥ-влак пашам ыштат да шочмо йылмышт, тӱвырашт верч тургыжланат. Мый гын куанен колыштам кок радиожымат. А мо удаже коммерческий мутышто? Оксамат вет ыштен моштыман. Марий-шамыч эре нужна шинчышаш улыт мо? Вот айста шоналтена кузе кок радиоланжат полшаш, пашаштым саемден колташ, оҥайрак ышташ. Мемнан кызыт шуко марий Северыште кугу оксам ышта, бизнесменна-влакат улыт. Тек ВГТРК Марий рдион фондшо гыч марий спектакль, муро-влакым налын Марий Эл Радиолан пӧлеклат. Кок радиожланат полыш, калыкланат — пайда.

  22. Эрге

    Чынымак ойлет

  23. Tsikma

    Шäлä! Пиш яжо хытырымаш кеä! Йошкар-Олашты 2 Радио улы гӹнь, тидӹ яжо веле. Тенге конкуренци улы — радиоколыштшывлä ик Радион программывлäжӹм ак ярыктеп гӹнь, радиоканалым вашталтен, весӹм колышт кердӹт. Малын мäлäннä со иктӹ веле лишäшлык? Ӹнянӹмӹ шоэш, ӹлен толын Якшар Халашты 3-шы мары радиоат лиеш. Цилä тидӹ мары йӹлмӹн фонланжы (фондлан агыл) палша, тенге алык мары йӹлмӹ шукырак ти халашты йонгаш тӹнгäлеш.

  24. Эрге

    Такшым нунылан ойло-ит ойло, огыт умыло садак,… шке мурыштымак мураш тӱҥалыт.

  25. Петан

    Пеш оҥай! Ме, мари-шамыч, вӱраҥлыме презе гай кандыра кутышышко веле коштына, да кок-кум лозунг ден илаш шонена. Икымше лозунг: «Мари марилан изак-шоляк!» — пуйто ме коклаштына келшен, икте весым нулен илена. Кокымшо: «Мо марий лӱман — тудо марий калыкын кидыштыже лийшаш!» — мландыжат, чодражат, культуражат, республикажат. Кумшо: «Пазар чыла ратышке шогалта!» — пуйто конкуренций акым волта, сайжым ыҥгай кода, а осалжым сусырта. Уремыште да пашаверыште икте улына, а МариУверыште — весе, тӱҥалына фэнтэзи дене шонен возкалаш, да виртуалыште чоҥештылаш. Кюсер чыным каласыш — «хватит заниматься эпистолярным онанизмом! Надо идти к людям.» Ме, тугак пӱтынь мари калык, нимомат вашталтен огыт керт шочмо элыштына. Илена Рушэл закон дене, а тудыжым чекгочсо эл гыч конденыт.

  26. Эрге

    Петан чыным ойла

  27. Эрге

    Мом вара ынде ыштет — тыгай ме улына.
    Рушэл закон шотышто… Колынам тыгайымат: «Кок Юмо уло мемнан, иктыже каваште, кокымшыжо — РФ Конституций. Когыньыштынат законжым от пудырто — илен кертат сайын»
    Эпистолярный онанизм шотышто… Кеч мом возо, тудым келшыдыме еҥ тыге лӱмден кертеш…

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s