1909–1917-ше ийлаште Иван Ключников-Палантай (24.04.1886–11.06.1926) Пермь губернийысе Усолье да Лысьва олалаште илен да пашам ыштен. Тушто тудо Сулий вӱд воктен илыше марий-влак денат палыме лийын да нуным илыме верлашкат миен коштын.
1912-шо ийыште тудым Лысьвашке А. М. Мальцев, верысе эмалироватлыме кӱмыж-совлам ыштыме заводын тӱҥ бухгалтерже, ожно Усольеште Палантайын хорышкыжо чолган коштшо, ӱжын.
Ончычсо политикле ссылкыште лийше семын Ключниковым полиций шекланен. Лысьва заводышто бухгалтер да пӧръеҥ гимназийыште туныктышо верым налаш манын, верысе черке хорын регентшылан пашам ышташ кайыде кертын огыл. Тылеч посна Палантай заводышто пашам ыштыше-влак гыч шогышо кумылзо (любительский) хорым вуйлатен.
1914-ше ий гыч 1915-ше ий марте И. Ключников верысе тӧра-влакын келшымышт почеш Петроградыште Степан Смоленский лӱмеш регент курсышто тунемын. 2-шо разрядан регент лӱмым налмеке, Тудо Лысьвашке пӧртылын, тушто завод пеленысе Шнуй-Кумиктылык храмын регентшылан пашам умбакыже шуен, воза Лысьвасе книгагудо.
Ты заводышто Урал кундемысе ятыр марий пашам ыштен. Палантай нунын дене палыме лийын да Эҥермучаш, Сулий, Эҥертӱҥ марий яллашке икмыняр гана миен. Южгунам тушто изирак концертым эртарен, фисгармонь дене шоктен, а калык мурен.
«Мылам тендан вел муро-влакым колышташ кӱлеш», – ойлен тудо. Палантайым тысе марий-влак чот пагаленыт да туддене кугешненыт, ешара «Кугарня» газет.
MariUver
Фото «Кугарня» газет гыч: Иван Палантай (пурлаште) тукым изаже Яков Ишпайкин (Эшпай) дене, Тимофей Евсеев лӱмеш Калыкле тоштерын фондшо гыч налме
политикле – политический,
Шнуй-Кумиктылык – Свято-Троицкий
MariUver 