Марий Элыште у тӱвыра проектын тӱҥалмыж нерген увертарыме. МЭТР телеканал Морко районышто шочшо серызе Валерий Апакаевын произведенийже-влак негызеш марий йылме дене сериалым сниматлаш тӱҥалеш.
Сериалын сюжетше сар деч варасе марий ялын илышыжлан пӧлеклалтын, тудым йочан шинчаж дене ончыктат. Сценарий Валерий Апакаевын «Волгалтше эртыше корнем» книгаж почеш ыштыме. Тушко авторын ойлымаш, муро, почеламут да шарнымашыже-влак пурталтыныт.
Тиде книган презентацийже писательын шочмо верыштыже Унчо ялыште февральыште лийын. Тудым савыктен лукташ В. Апакаевын эргыже Борис Апакаев темлен.
Войзымо вер серызын шочмо ялыштыжак лиеш. Проектыште верысе калык, фольклор коллектив, тӱвыра пӧрт-влакын пашаеҥышт, тыгак Унчо этнокультур комплексын коллективше лийыт.
Кызыт съемкылан ямдылалтыт: актёр-влак кастингым эртарат, реквизит да войзымо верым ойырат. Ик тылзат пеле гыч сериалым войзаш тӱҥалаш шонат.
MariUver
MariUver 