24 февраль гыч 2-шо март марте Ӱярня арня лиеш. «Сурт-пече» газет кушто да мо лийме нерген «Марий тӱня» лаштыкыштыже воза.
Тӱҥ пайрем
2 мартыште Йошкар-Олаште Ӱярням, марий кечышот йӱла пайремым, палемдаш тӱҥалыт. Тудо телым ужатыме да шошым вашлийме пайремлан шотлалтеш да Шорыкйол деч шым арня эртымеке толеш. Тений Марий паркыште эртарат. Организаторжо – республикысе Марий тӱвыра рӱдер.
Тушко фольклор коллектив-влакым вучат. Йодмашым mari-centr_konkurs@mail.ru электрон адресыш колтыман. Лекше йодышым (+7-8362) 45-88-51 телефон дене рашемдыман.
Семинар-практикум
20 февральыште Оршанке районысо Кугунур тӱвыра пӧртыштӧ Ӱярня пайремым эртарыме шотышто республикысе семинар-практикум лиеш.
Йоча-влаклан
«Йоча Ӱярня» тений 1 мартыште Шернур районысо Кукнур селаште верланыше Марий Йӱштӧ Кугызан илемыштыже лиеш. Тушко ушнаш кумылан школ коллектив-влак тыгак Марий тӱвыра рӱдерыш йодмашым колтышаш улыт.
Кажне туныктыш тӧнеж гыч куд еҥан командым ямдылыман. Нуно «Чевер Ӱярня» конкурсышто шке усталыкыштым ончыктат. Тудо кум заданий гыч шога: пайремын символжым – «Ӱярня кувам» – ыштен да «Ӱярня мелнам» кӱэштын, презентацийым эртарыман; «Ӱярня такмак» муро таҥасымаште шке усталык дене палдарыман, сера «Сурт-пече».
Более подробно по-русски в Telegram:
https://t.me/mariuver/337
MariUver
MariUver 