Ӱярня тылзын 21-ше кечынже Йошкар-Олаште, Сергей Чавайн лӱмеш книгагудышто, «Кундемнан шӧртньӧ поянлыкше» книган презентацийже лиеш. Тидын нерген «Марий Эл» КТРК увертара.
Тудын авторжо республикыште палыме кундемшымлызе, Марий Эл тӱвыран сулло пашаеҥже, республикысе Александр Суриков лӱмеш кугыжаныш премийын лауреатше, шке жапыштыже Тимофей Евсеев лӱмеш тоштерын директоржылан пашам ыштыше Мария Матукова улеш.
Книгашке марий сылнымутын классикше Сергей Чавайн, икымше марий профессионалле режиссёр Алексей Маюк-Егоров, марий театрын артистше-влак Анастасия Тихонова, Нина Конакова, Анастасия Страусова, Российын сулло сӱретчыже Иван Ямбердов да моло-влакын илышышт да усталыкышт нерген очерк-влак пуреныт.
MariUver
Фотосӱретым «КонтактЫште» мервотышто улшо «Издательский дом «МариКраевед»»тӱшка гыч налме
кундемшымлызе — краевед
профессионалле — профессиональный
мервот — соцсеть
MariUver 