Чумбылатлан кумалаш каяш ямдылалтына

Тений Киров область Советский районысо Чумбылат курыкышто кумалтыш пеледыш тылзын 25-ше кечынже лиеш, увертара «Марий Эл» газет.

Чонан надыр дене мийыше-влакым Шернур районысо «Марий кумалтыш» общинын вуйлатышыже Вячеслав Мамаев 6 шагат эр марте толын шуаш йодеш.

Йошкар-Ола гыч каяш кумылан-влаклан автобус лиеш. Тидын нерген Марий юмыйӱла ушем ончылгоч увертара.

Чыла лекше йодышым +7-927 877 57 49 але (+7 -8362) 424 553 (паша кечын) телефон дене йыҥгыртен рашемдаш да возалташ лиеш. Автобус 7 шагат эрдене Гагарин проспектын 8-ше №-ан пӧртшӧ воктеч (Шернур кугорно дене) тарвана.

Кумалтышыш каяш шонышо-влаклан ончылгоч ямдылалтме нерген мондыман огыл: мончаш пурыман, пырля наҥгаяш сортам, пӧлекым (шовычым але носким лиеш), чесым (тичмаш киндым), пелештыме кочкышым авызлаш кӱмыж-совлам, тыгак ший оксам ямдылыман.

А эн тӱнжӧ – шонымашда волгыдо лийже, воза «Марий Эл» газет.

MariUver