Ӱярня тылзын 19-ше кечынже Марий мер каҥаш Йошкар-Олаште Марий форумын шошо сессийжым эртара. Тудо «Мер пашам виктарымаште ТУЙ дене кыл да цифран технологийым кучылтмаш» темылан пӧлеклалтеш.
Марий форум кышкарыште Пошкырт кундемын калык художникше Георгий Калитовын ончерже 9 шагатлан почылтеш. Тудо Мер-политик рӱдерыште 15 апрель марте шуйна.
Марий форумыш тӱшка увер йӧн да цифран технологий аланыште тыршыше-влак, журналист, марий калыкын тӱшкан илыме кундемлаж гыч мер пашаеҥ-влак ушнат. Тидын нерген Марий мер каҥаш «КонтактЫште» мервотышто увертара.
Тачысе «Марий Эл уверыште» Мер каҥашын председательже — Оньыжа Эдуард Александров 14:15 гыч йодыш-влаклан вашешта.
MariUver
ТУЙ — тӱшка увер йӧн, рушла СМИ — средства массовой информации;
мервот — социальная сеть < мер «общественный, социальный» + вот «сеть»
MariUver 
Тыгай вашлиймаш-влак, мутат уке, пеш сай. Но айста ончалына, колыштына кузе Ирина Алтаева “марла кутыра», иктаж 80-90% мутшо руш… Йӧра эн тӱҥ чолгаеҥже Вячеслав Теркин марла кеч изишак сайрак ойла, но тыгак пеле рушла, пеле марла… Икте куандара — Угарман марий автономийым вуйлатыш курыкмарий Анатолий Семятнев марла пеш яндарын кутыра. Вот кӧ чынжымак марий калыкнам, йылмынам пагала да арала! Ну марий мер пашаште улыда гын, кеч марлаже изишак сайрак кутыраш лиеш! Тыге чучеш ни Алтаева, ни Теркин ни марий газет, журнал-влакым огыт луд, ни марий радиом огыт колышт, ни марий ТВ-ым огыт ончо. А молан тендан рушла ойлен марий йылмынам, тӱвыраным пуйто араледа ман ончыкташ кӱлеш? Тендан Угарман областьыште ик марий йоча сад, школыштат марий йылмым огыт туныкто. Те шкежат шотшо дене марла ойлен огыда мошто, йочадамат марла ОГЫДА ТУНЫКТО!