Ӱярня тылзын 8-ше кечынже Эстонийысе Тырва олан библиотекыштыже «Урал калык-влакын шнуй верлашт» лӱман ончер почылтын. Фото-влак коклаште чимарий ото-влакымат ужаш лиеш.
Выставкым Эстон кӱсото-влак фотоконкурсыш 2014 ий гыч колтымо ойырен налме фотосӱрет-влак гыч чумырымо. 2013 ий гыч таҥасымаш тӱнямбал кӱкшытыш лектын. Да ту ийысе тӱҥ премийым 1000 евром Сергей Таныгинын «Тӱнямбал кумалтыш» фотосӱретше сулен налын.
2014 ий гыч тӱҥ оксадар Эстоний гыч участник-влаклан вел пуалтеш. Российысе финн-угор калык-влаклан 300 евро кугытан посна суапоксам ыштыме.
Фотоончерым Тарту университетын пӱртӱс шнуй вер-влак рӱдерже, «Кӱсото-влак пӧрт» фонд — Hiite Maja SA чумыреныт. Текстым Ахто Каасик возен. Выставкым «Фенно-Угриа Тӧнеж» парышдыме объединений савыктен.
Ончерыште финн, саам, карел, ижор, лив, коми, одо, марий, эрзя, меря, хант чодыра ненец, сету да эстон шнуй вер-влак гыч фотосӱрет-влакым 31 март марте ужаш лиеш, воза «Фенно-Угриа».
MariUver
MariUver 