Марий Юмынйӱлан рӱдо ушемже (МЮРУ) дечын онаеҥым колташ йодмо серышлан вашмут таче марте эше толын огыл гынат, «Юмарий» школ пашажым палемдыме расписаний почеш ыштен шога.
Пытартыш кум занятийым тунемше-шамыч онаеҥ дечын посна, шкевуя эртарышт.
Занятийыште ӱдыр-рвезе-шамыч марий йумынйӱлам шуктен шогымо, философий могыржым тунемыт, ваш-ваш каҥашен темым умылымыштым тергат. А могай йодышыжо умылыдымо кодеш гын, тудым возен кодат. Вараже нуным кугурак еҥ (очыни, МЮРУ дечын колтымо онаеҥ) дечын вашешташ, умылтараш йоднешт.
Тыгак тунемше коклаште тыглай мутланымаш вияҥын толеш. Тыгай годым йумынйӱла ратым шуктен шогымо шӧрынжӧ дечын кораҥын таче кечын айдеме ончылно шогышо проблеме-влаклан чимарий философий могырым вашмутым кузе пуаш лиеш манын шонкалат.
Мутлан пытартыш занятийыште Тӱня юмын шочыктышо ӱнарже лушкен кертме ден экологий коклаште раш кыл улмым палемдышт. Тыгак у шонымаш ден консерватизм, нужналык ден осал-паша кокласе кыл да шуко моло йодыш-влак тарваталтыт.
Икманаш, занятий-влак эртат, да пеш оҥайын! «Юмарий» школыш ушнаш шонышо-влакым «Марий ушем» офисыш ӱжына.
«Марий ушемын» инфорӱдерже
Налмывер: Марий ушем
MariUver 
Вот мемнан, марий-влакын, эре тыге: нигуштат, нигунамат коклаштына кутырен келшен огына керт… Вара поро, суапле паша тидлан верч орлана…
Чын ойлет шол. Онаеҥ-влак тореш лийыныт гын тыгай поступок дене нуно шкеныштым пеш чот амыртат. А самырык шамычын энергий шуко уло, иктажгушко чыкаш кӱлеш. Чаракым ыштен нуным шогалташ ок лий, виктараш гына. Марий ушемысе школ энергийым конструктивный, пайдале могырыш колташ полша. Тыште онаеҥ-шамычлан самырык еҥ-влакым кидышкышт гына налаш ыле, Марий ушем тидлан шкеак тореш огыл коеш. Ала вашмутышто иктажможо рашемеш, вучалтена.
Иктажгӧ пала мо кузе паша кая? Мый шонем огыт келше онаеҥ шамыч тидлан кеч ондак келшена маныныт гынат. Маркеловым сырыкташ лӱдыт. А Маркелов неконтролируемый юмыйӱлам тунемме школлан садак ваштареш лиеш. Маркелов, Путин — чыла власть Российыште ик калыкым кодынешт, рушым. И нунын ик религий веле лийшаш — поп йымалне кошташ. Тыланем рвешамычлан тӱҥалмашыштым кудалташ огыл. Чын пашам ыштеда, а шоякше чояже жап толын шке кӱнчымӧ лакышкыштак логалыт.