Ынде ик тылзе утла Йошкар-Олаште «Марий Радиом» FM диапазонышто 106,0 чӱчкыдылыкышто колышташ лиеш.
«Марий Радио» шочмо гыч кугарня марте кечылан кум шагат рушла да марла йоҥга: 7.00 — 8.00, 13.00 — 14.00, 18.00 — 19.00, шуматын — ик шагат: 10.00 — 11.00, рушарнян — кок шагат:8.00 — 9.00, 10.00 — 11.00.
FM диапазонышто ик тылзе жап «Марий Радион» Йошкар-Олаште ойлымыжо икмыняр иктешлымашым ышташ таратыш.
Икымше, эше ик марий радиом мемнан рӱдӧ олаштына колышташ сай йӧн лектын.
Кокымшо, «Марий Радион» паша кышкаржым шукын огыт пале. Садлан тидын нерген марий-влаклан чӱчкыдынрак увертарыман.
Кумшо, радиопередаче-влак интернетыштат лийшаш улыт (плеерыште онлайн да аудиофайл семынат).
Нылымше, радиопередаче-влакын качествыже изиш окшакла, вияш эфир ок сите. Могай телефон дене эфирыш лекташ лиеш? Могай пӱсӧ йодыш-влакым «Марий Радиошто» каҥашен кертына?
Икманаш, йодыш шуко. Туге гынат, тиде пеш сай ошкыл. Умбакыжым «Марий Радион» вияҥмыжым вучена.
Алексей Андреев
Фото: vnd12.ru
MariUver 
FM диапозоныш лекме нерген колынам ыле — пеш сай. Но Марий Эл деч тораште илена, садлан пеш вучена кунам тошто сай Марий Радио Интернетыш лектеш.
Чынже денак пеш вучена, ару да яндар, марий интонациян шочмо йылмым колыштмо шуеш.
Марий Радио да Марий Телевидений концертлам эртараш тӱҥалыныт. Кунам хит-парадым эртараш тӱҥалыт?
Марий радион вияҥмыжым вучен огыда шукто. Кызытсе режим чыла национальный телерадиоканал-влакым пытарен толеш.
А тевыс анонимлан хит-парад кӱлеш лийын. Сита эре мураш да кушташ, лучо ончыклык илышна нерген шоналтыза. Тыгак мураш да кушташ гына тӱҥалына гын, вашке ме этнос семын йӧршеш йомына.
«Воштончыш» передачым Марий радиош пӧртылтыман.
какшан марий, чынжымак кызытсе кучем деч марий радиом, ТВ-ым вияҥдымашым пешыжак вучаш ок код. Но хит-парад-влакат кӱлыт, Марий Эл Радион колыштыжо икте да хит-парадшат тугайрак, а вот, мутлан, могай марий мурым эн сайлан тошто Марий радиом колыштшо-влак шотлат — палаш оҥай ыле. Марла радио, ТВ вияҥже манын мыланна марий-влаклан шкаланнат тидын нерген чӱчкыдынрак ойлыман, власть деч пеҥгыдын йодман. Лач лӱмдымын але шонен лукмо лӱм дене гына тыште возкален ме нимом пешыжак огына вашталте. Вашталташ шке лӱм дене Марий Эл КТРК-аш, Марий Эл Радиош, Марий Эл виктерыш (правительствшыш) тидын шотышто шукырак возыман да пеҥгыдын йодман.