Тарту университетыште 3-шо февральыште уста шымлызым, Пауль Аристэм, шочмо кечыже вашеш шарналтеныт.
Кумдан палыме эстон лингвист, этнограф финн-угор йылме кокла гыч утларакшым эстон, водь да одо йылмылам шымлен. Шке жапыштыже шанчызе кугу водь мутерлан негызым пыштен, шуко экспедицийлаште лексике материалым водь йылме дене поген.
Тидланак кӧра, тиде кече эше водь йылмыланат пӧлеклалтме лийын: «Кова деч уныкалан» фотоончерым почыныт, 30 минуташ «Водь полшымо дене ойлымаш» кином ончыктеныт да пытартышлан водь ден ижор калык муро-влаклан пӧлеклатше интернет-лаштык дене толшо-влакым палдареныт.
Ончерым Хейнике Хейнсоо почын. Тудо икмыняр ий водь йылмым шымлен. 2010 ий гыч водь йылмым туныктымо курс дене шогылтеш. Тиде курс кажне кеҥежым эртаралтеш. 2015-ше ийыште водь йылмым тунемашлан книгам луктыныт. Тушто шуко текст, мотор сӱрет улo. Икманаш, тунемаш шонышылан тиде книга почеш у йылмым пален налаш, пеш сай йӧн ышталтын. Тунемше-влак тушто йылме нерген гына огыл, культур нергенат пален налын кертыт. Леанне Барбо да Яаника Орас курслаште мурымаш да куштымаш деке шӱмаҥдат.
Мадис Арукаськын изирак киноштыжо лачак пытартыш йылме курсын кузерак эртымыже нерген ончыкталтеш.
Водь йылме дене шуко мом интернетыште муаш лиеш. Мутлан Фейсбукышто «Слово дня на водском» лаштыкыште кызытсе кечылан 722 еҥ уло.
Вот тыгераш лӱмлӧ эстон шанчызе да водь йылмылан пӧлеклалтше мероприятий эртен.
MariUver
MariUver 