Шорыкйол тылзын 31-ше кечынже мемнан Тарту марий рушарня школышкына Австрий да Германий гыч уна-влак толыныт да чылан марла кутыреныт.
Уна-влакым школыш ӱжаш марий йылмым туныктышо Валентина Семенова шонен пыштен. 31 январь гыч 6 февраль марте Тартушто IV финн-угор теле школ эрта. Туш тӱрлӧ элла гыч студент да самырык шанчызе-влак погыненыт: кӧ тунемаш, кӧ гын шке туныкта. Тыгак школыш марий тӱняште кумдан палыме шанчыеҥ Джереми Брэдли дене пырля марий йылмым шымлыше-влакат толыныт.
Вена университет гыч кок магистрант, Эстер Штоккер ден Микке Майер, лийыныт. Нуно 2013-14 ийлаште Джереми дене пырля кум семестр марий йылмым туныктеныт. Тыгак Марий Элыш да Пошкырт кундемышкат чылан кумытын миен коштыныт.
Мӱнхен гыч Бригитте Хубер ден Мадлен Врук толыныт. Ӱдыр-влак октябрь тылзыште марий йылмым тунемаш тӱҥалыныт веле гынат, марла ойлымо деч вара «илышак кодыныт», шыргыжал каласыш Джереми.
Да чыла нине ныл ӱдырым да Джеремим эртыше ийын Марий тиште кечылан ямдылыме видеоштат ужаш лиеш.
Мӱндыр уна-влак йоча-влак дене марла палыме лийыныт. В.Семенова пластилин дене подкогыльым «тӱрлаш» туныктен.
Музык урокым вӱдышӧ Анна Мишина дене пырля С.Волковын «Шошо толын унала» мурыжым тунемыныт да муреныт.
Вот тыгерак веселан да оҥайын марий рушарня школын черетан занятийже эртен каен.
Васли Николаев,
Тарту марий-влак ушем вуйлатыше
Фото-влакым Джереми Брэдли пуен
MariUver 
Пагалыме эрге-у:дырна! Моткоч куанен лудым черетан марий йылме урокда нерген. умбакыжат пашада ушныжо. Лийза тыгаяк ончык шонен моштышо, амал йо:ным муын пашам вораНдарыше АЙДЕМЕ-ВЛАК.
Мари йылмына деке шу:маНдарен моштышо туныктышо тунемше улыда.