Пеледыш тылзын 21 кечынже Виче кундем Кукарка районысо Чумбылат курыкышто кугу марий кумалтыш лиеш.
13-14 июньышто кумылан-влакым кумалтышлан ямдылалтмаш пашашке ушнаш ӱжына. Каена да кӱсотым эрыкташ, ямдылыме пашам шукташ, тӱрлӧ сомылым ышташ тӱҥалына, воза Марий тӱвыра рӱдер.
Лекше йодышым +7-927 877-57-49 (Галина Алексеевна) телефон номер ден йыҥгыртен, рашемден кертыда.
Кӱсотышко каяшлан картым тыште ончал кертыда.
Налмывер: Марий тӱвыра рӱдер
Виче кундем (рушла Вятский край) — Киров область
Кукарка — Советск
тӱвыра — культура, рӱдер — центр
MariUver 
Фейсбукышто ты увер йымалан ик еҥ возен
Сергей Иванов
Могай тиде ылме ден возеда?…,кузе умылаш тидым?…
Мыйын вашмутем:
MariUver
Сергей, тау шке шоныметым возыметлан. Но пуымо кылвер (ссылке) почеш каен уверым мучаш марте лудат ыле гын, ужат ыле тушто мо тыгай Виче кундем, Кукарка умылтаралтын. Марий-влак ожно шке илыме верыштым, да воктен улшо вер-шӧрым марла ойленыт. Виче — Вятка, Советск тиде ожнысо Кукарка марий ола. Тылзе лӱмымат марла ойленыт… Марла шукырак окыза, вара тыгай йодыш ок лек 🙂
Южо марийлан «21 июньышто Кировский область Советский район Чумбылат гораште марийский моленийым проводитлат» ман серыме «марла» йылме лишылрак… Марий Эл КТРК-ан передачылаштыже шуко марий тыгак и ойла. Марла ТВ-м от ончо, радиом от колышт, газет-жырналым от луд да марла от возо гын, чынжымак чын марий литератур йылмым умылаш йӧсӧ.
Тыге пеле рушла, пеле марла куктештмаш марий-влакын эркын рушаҥ толмыштым ончыкта. Шӱлыкан сӱрет.