28 апрельыште Эстонийын студент олаштыже Марий талешке кечым палемденыт.
Пайремын официалле ужашыже Эстон калык тоштерын Ончер пӧртыштыжӧ 17 шагатлан тӱҥалын. Ончыч Васли Николаев марий талешке-влак нерген каласкален да видеопрезентацийым ончыктен. Вара лӱмлӧ эстон серызе Арво Валтон «Югорно» марий эпосым эстон йылмыш кусарымыж шумлык ойлен.
Татьяна Албахтина марий рушарня школ дене палдарен. Школыш коштшо Эдвин Матвеев марла «Шошо толын, шошо» почеламутым лудын пуэн. Марита Шорникова ава нерген мурым муралтен. Лиза Салмиянова флейте дене марла семым шоктен.
«Тарту марий-влак ушемын» «Марий кумыл» ансамбль лӱмжӧ дене погынышо-влаклан мурпӧлекым Анна Мишина ден Елена Ласточкина ыштеныт. Ончыч А.Мишина Татарстан кундем рекрут мурым муралтен. Вара Анна ден Елена «Пиал дек кайме корно» мурым шергылтареныт.
Мучашлан Марий Эл гыч толшо «Олык сем» ансамбль чапле концертым ончыктен.
Пайрем умбакыже Сылнымут пӧртыштӧ шуйнен. Тушто изиш кочкаш-йӱаш, ансамбль еҥ-влак дене пырля марла мурен кушталташ йӧн лийын.
Йоча-влак кузе марий талешкына-влакым ужыт ончер почын пуэн. Жюри эн сайлан М.Шорникован сӱретшым палемден.
Тартуш, шке марий калыкшым пагален, пошкудо Финляндий гыч марий шанчызе Лидия Тойдыбекова-Мустонен толын. Тудо Тарту марий, толшо уна-влаклан шуко поро мутым ойлен.
Тиддеч ончыч «Олык сем» кок кечым финн-угор рӱдолаште, Обиницаште, лийын. Таче Талешке кечым Таллинныште палемдат.
Ансамбльым Эстонийыш «Фенно-Угрий» ӱжын, Тарту мероприятий-влакым тӱҥжым «Тарту марий-влак ушем» да марий рушарня школ ямдыленыт да эртрен колтеныт.
Пайрем гыч видео-влакым тыште муыда >>
Тарту мероприятий гыч фотосӱрет-влак:
Васли Николаев,
«Тарту марий-влак ушем» вуйлатыше
Фото: Васли Николаев, Арп Карм
Арп Кармын моло фотожым тыште ончыза.
MariUver 
Чылалан кугу тау. Ме кудуш каена. Олык сем.
Тыланда тау Эстонийыш толмыланда, корнан лийза.
Путырак моторын палемденда! Эн кумылло Тартусо йоча-влакын марла ойлымышт!