6 октябрьыште Кужеҥер район Нурсола ял воктенсе «Ош куэр» отышто тӱня кумалтыш лиеш. Марий-влак вич тулолмо дене кумдан кумалаш тӱҥалыт.
«Ош куэр» ото Шернур да У Торъял кугорно ушнымаште верланен. Тиде отышто кумалтыш вич ийлан ик гана эртаралтеш, пытартышыже 2008 ийыште лийын да ятыр марий калыкым тӱрлӧ кундемла гыч чумырен. Вич ий жапыште отышто ятыр пушеҥге кошкен, укшер кушкын, шогалтен кодымо меҥге-влакат шӱйыныт.
Кумалтыш жап толын шуэш, садланак уло марий калыкым 7-8 сентябрьыште Ош куэр отым эрыкташ ӱжына. Эрден эрак, пижергым налын, Кужеҥер район Нурсола ял отышко мийыза. Кутырен келшыме почеш отым эрыкташ воктен улшо ялла гыч калыкат погына. Эрыкташ толмыдам кумалтышлан надырым ыштыме семын шотлаш тӱҥалына.
Фото М. Скобелевын: Ик ийын теве тыге У Торъял районышто Саваран отым эрыктен шындыме
Марий Эл Республикысе рӱдӧ юмыйӱла ушем
Йӱрлан кӧра ото эрыктымаш вес арняш кусаралтеш.