MariUver сайтым эре эскерем, лудам мом середа, куанем кунам ужам шоҥго чонлан келшыше комментарийым. Южгынам шыдешкемат, кунам утыж дене торжа мутым кучылтыда. Чыла тидым шотыш налын, мый тендан деке лектам тыгай темлымаш дене.
Ме шке марий йылмым, руш манмыла, «рабочий» йылме семын чыла вере огына кучылт гын, вара кузе «рабочий инструментын» качествыжым саемдаш? Келгынрак шонкален, вуйнам пудыратен, ала ик кӱлешан сомылым ышташ ямде улшо–шамычым кычалаш тӱҥалына? Ала улшо чыла вийым иктыш чумырен пашалан пижына?
Тендан мутланымаште «объект» манме сомыл–влак раш палдырнат. Марий–влак ончылно шогышо национальный йодышым нимынярат, нигӧ нигунам ышташ огеш тӱҥал. Могай сомыл–влак марий наций ончылно улыт, ме чыланат ырес-тореш палена. Нуным радамлен ончыктымо огеш кӱл. Могай мемнан «потенциал» уло тиде пашам шукташ, шке ужыда да паледа. Лончылымо огеш кӱл, кӧ виянрак, а кӧ пеш огыл. Материал кӧвелен сита. Ик Лариса Яковлева лӱмеш возымо комментарий-влак ситат. Тыште чыла уло: патриотизмын пӱсылыкше, образованийын келгылыкше, кругозор кумдалык. А могай сарказм?! Лач икте огеш сите — иктыш ушнен пашалан пижмашыш ӱжмаш.
Вет нигунам нимогай юмо мланде ӱмбаке волен мыланна огеш кӱштӧ — погыныза, марий-влак, эрла мый тендам ик чумыркаш ушем!
Тугеже ме мом вучена?
Кӧм гынат «лидер» семын ойыраш жап шуын. Талукат пеле гыч адак «Мер Каҥашым» сайлаш тӱҥалына. Кодшо годымсо семынак нимом ямдылыде умшам карен вучаш тӱҥалына мо? Мом кондат, кӧм сайлат? Жап эртымек адак ылыжтена нигӧлан нимом кондыдымо вараш кодшо критикым.
Тачысе кечылан марий калыклан келшыше, тудын йодмыжым шукташ шонышо национальный толкын уке. Садлан, улшо пашам шкаланак ышташ логалеш.
Йодыш уло: лийын мо чылт национальный тӱсан марий мер толкын? Толкын помышеш шочын да кушкын мо иктаж-могай национальный организаций? Лийын гын, палемдаш лийше пӱтынь нацийлан келшыше паша ышталт кодын мо?
Шонымыдам лончылен, радамлен ончыктыза. Кажне йодышлан вашмутым, марий манмыла, ослен-ослен оптыза.
Йодмаш эре икте: айста кораҥына лӱмдылымаш деч, арам мыскылымаш деч. Ик тиде йодмашым шуктена гын, пашаш пижмашын тӱҥалтышыже уло манын кертына.
Тыгай тӱшкан мутланымашым лиеш эртараш MariUver лаштыкыштыжат, «Мер Ой» пеленат.
Могай шонымашда уло серыза, MariUver-ыш, мый декемат, www.meroi.ru адресыш.
Поро шонымаш дене тендан деке,
Шоҥго
Налмывер: mari-el.name
MariUver 
Пагалыме «Ш..»! Ты лÿм денак Тыйым ом ман, изиш илалшерак улат гынат. «Шоҥ гай» тоже ом ман, илышет да пашат тугаяк куштылго огыл. Йодмашет пеш пÿтыркалтыме, ик мучашыжат ок кой, чылт «Гордиев узел» гай. Тудым руалашат, руалташат ок кÿл, кораҥдаш веле. Вет Тый йодат иктым — «кораҥаш лÿмдылмаш, мыскылымаш дечын». Рушлаже — политкорректный лияш, толерантный. Ну кертат уке шыма лияш, кунам тылат у пöртым Пизанский башня гайым сумырлаш тöчышым ыштынешт, и кычкырат: — Пеш сай пöрт! Тыгак марий мер толкыным, Марий Ушемым, Мер канашым сÿмыраш тöчат? Тый, чоҥышо мастер, «отвес» деч посна пырдыжым оптенат? Вот «Мыскылымашна» и улеш «Отвес» да «Уровень».