15 сентябрьыште 14 шагатлан Тимофей Евсеев лӱмеш калыкле* тоштерыште «Кок мургорно, кок сӱрет…» сылнымут да сӱрет ончер* почылтеш.
Тудым Суоми эл гыч финн поэт ден сӱретче-влак ончалаш темлат. Тийти Менделин, Туула Палмунен, Кати Юхола, Саари Сеппо, Туула Никулайнен, марий мутмастар, кидмастар, художник-влак дене вашлийын, шке пашашт нерген мутланаш ямдылалтыт. Сымыктышын кок жанржым иктеш ушен, автор-влак кок калыкын чон поянлыкшым таҥастарен шымлаш шонат.
Родо-тукым калык-влакын уста еҥже-влак дене вашлиймаш – тиде шукертсе йӱла. Уна-влак Марий Элыштына 25 сентябрь марте лийыт. Тиде жапыште нуно Йошкар-Ола дене палыме лийыт, марий художник-влакын мастерскойышкышт мият, Морко, Шернур, Килемар, Курык марий районласе калык дене вашлийыт.
У проектым Финляндийысе Тÿвыра пундо* илышыш шыҥдараш полша. Проектын кураторжо – Софья Чеснокова-Вääри.
Зоя Глушкова
Налмывер: «Марий Эл» газет
* калыкле — национальный, ончер — выставка, Тÿвыра пундо — Култур фонд
MariUver 