Станислав Шакиров: Калык дене кыл — йоҥгалтарыме мурем гоч

Станислав ШакировСтанислав Шакиров пытартыш ийлаште посна концертше денат, марий мероприятийлаштат шуэн койын.

Телым Станислав дене пырля пошкудо кундемысе марий-влак дене гастрольышто лияш логалын. Ик суртышто ӱстел йыр уна лийме годым тудым эскерышым. Артистын мыскара койышыжо улмым шижым. Уке-уке да ончычсо гастрольлаште лийше воштылчыкым, кочажын ойлымыжым шарналта.

Сценыш лекме деч ончыч шке семынже кужу жап шонкален шога гын, зал тич улшо калыкым ужмеке, кумылжым пӱтынек нунылан пуа. Ик ял гыч вес ялыш кудалме жапыште мöҥгыжö я йыҥгырташ вашка, я тудын деке йыҥгыртат. Эше корныш лекме эрденак куанен   каласыш: «Таче эргым икымше гана «ача» мане».

А эрлашыжым Тамара пелашыже адак ушештарыш: «Алеша кечыгут «ача» манын коштеш».

Йöратыме мурызына кызыт могай кумыл, шонымаш дене ила, умылаш йöсö огыл. Туге гынат 23 апрельыште эртышаш концертше вашеш икмыняр йодышым пуышым.

— Станислав, 20 ий лӱмгечылан ок шотлалт гынат, профессиональный музыка дене лач тынар ий кылдалтынат. Тунамсе жап гыч кызыт мо але кö шарналтеш?

— Чынак, 20 ий ончыч А.Искандаров лӱмеш Марий кугыжаныш филармонийыш пашаш пуренам. Тунамак мартыште телевидений дене «Какшан сер ӱмбалне ломбо» муро икымше гана йоҥген. Таче тунамсе пагытым порын шарнем. Филармонийыште «Элнет» ВИА-ште профессиональный музыкант-влак дене сай практикым эртенам. Творческий корнем Валерий Кульшетовын «Тый манат», «Пиалан ӱжара», Вениамин Захаровын «Юмын ӱдыр», Сергей Маковын «Мыйын огыл мо» мурышт дене тӱҥалынам. Раисия Данилова дене поро кылым кученна, ятыр вере гастроль дене лийынна. А вара семым шке возаш тӱҥалынам. Поэт-влак кокла гыч Вячеслав Абукаевын мутшылан шуко мурем уло. Тудын усталыкшым моткоч пагалем. Светлана Эсаулован почеламутшо-влак моткоч келшат. Тыгак Татьяна Пчелкинан мутшылан возенам. Пытартыш жапыште Надежда Никитина дене кылым ыштенна. Чылаштланат кугу таум каласем.

— А кызыт композитор-влак мурым темлат?

— Уке. Но темлат гын, уло кумылын налам, молан манаш гын ик айдемын возымо ойыртемже ик семын йоҥга. Южо муро чоныш ок пиж, калык декат ок шу, да кок-кум концерт деч вара репертуар гыч лукташ логалеш. Мурызылан тӱрлö сынан муро кӱлеш.

— Семым возымо талант тыланет вӱр гочак шыҥен?

— Тыгеат манаш лиеш. Тукымыштына музыкант-влак улыт. Поснак авамын изаже Анатолий Кукубаев Пошкырт мландыште кумдан чапланен. Башкортостанысе сымыктышын сулло пашаеҥже, композитор. Тудо башкир семым возен, поснак семӱзгар-влак дене шокташ шуко келыштарен. Башкортостан Республикыште тудым эреак порын шарнат. Чӱчӱм дене моткочак кугешнем.

— Станислав, пытартыш ийлаште тыйым сценыште пеш шагал ужына. Пресса ден телевиденийыштат от кой.

— Творческий айдемын тыгай жапше лийшаш. У мурым возаш, шкан иктешлымашым ышташ кӱлын: мый тиде пашамак шуйышаш але йöршеш чарнышаш улам. Адакшым ончышо дене вашкыл мыйын мутем гоч огыл, а сценыште йоҥгалтарыме мурем гоч уло. Чыла мурем «тылат» мут дене кылдалтын, «мылам» шонымаш дене иктат уке. Музыкант-влак кунам фонограмма деч посна шоктат, тунам кажне гана концерт у сынан лиеш. Концерт кечым палемдыме годым вес артист-влаклан мешаяш ом шоно, кöн кунам эртарымыжым эскерем. Адакшым февраль-мартыште Пошкырт, Татарстан кундемлаште, Екатеринбургышто гастроль дене лийынам.

— Администратор пашам шкеак шуктет. Иктаж еҥым тиде пашаш налаш кумыл лийын огыл? Вет тунам мурсаскалан утларак жап лиеш.

— Уло кумылын налам ыле. Но тыгай еҥ-влакын артист пелен пашам ышташ кумылышт кӱчык жаплан гына. Писын гына оксам шукырак ыштен налаш шонышо-влак улыт. А мый, ончыко ончен, кужу жаплан проект дене пашам ыштынем. Творчество шотышто шонымашем пеш кугу.

— Станислав Шакиров иктаж гана концертым яра эртарен кертеш?

— А молан ок керт? Татарстанын лӱмлö артистше Салават семын кугыжаныш велым сай полыш, студийын верже, келшыше пашадар лийыт гын, конешне, яра концертымат эртарем ыле.

— Станислав, а мурсаскалан тачысе кечын тыйым мо кумылаҥден шога?

— Пелашем, тыгак эргым-влак. Изирак эргым теве 1 апрельыште  кошташ тӱҥалын. Нуно мыланем илыш вийым ешарат. Ончыч гастрольышто кужунрак лийме шуын гын, кызыт писынрак мöҥгö пöртылаш шонем.

— Кугурак эргычше дене вашлийыда? Аваж дене могайрак кыл?

— Максимын кертмыж семын вашлийына, кыл нигунамат кӱрылтын огыл. Мый вашлияш йöным эре кычалынам. Зоя дене ик жап  икте-весынам умылен огынал. Но жап  чыла шке верышкыже шында. Таче умылымаш уло. Мый тиде ӱдырамашым чынже денак пагалем. Кеч-мо гынат, тудо эргымын аваже. Тудат шке саскале* корныштыжо шуко йӱштö-шокшым чытен.

— А кузе тый канет?

— Сай мурым возымо, паша деч вара сай лектышыш шумо деч вара. Тыгак — кеҥежымсе гастрольышто.

— Пеледыш пайремыште молан от кой? Тыйым калык вуча. Мер пашаштат огына уж.

— Пытартыш кок ийыште Пеледыш пайремыште лийын омыл, огыт ӱж. Организатор-влаклан сценыш шукырак артистым лукташ йöнанрак. Мер пашам мый мурем гоч ыштем, шонем. Марий калыкым, йылмым ом йöрате гын, мурыжымат ом муро ыле. Чылажымат йöратен ыштем. Марий йылмын арулыкшо мурызо-влак денат кылдалтын. Сандене кажне мурым возымем годым текстлан шуко жапым ойырем. Кызыт качество кугу рольым модеш. Ме, артист-влак, ответственностьым шижшаш улына. Ик кечашым огыл, курымашлык мурым мурыман.

— Тау чон почын мутланаш келшыметлан.

Светлана Пехметова
мутланен

Налмывер: «Марий Эл» газет

*саскале — творческий

2 комментария

Filed under Артикль-влак

2 responses to “Станислав Шакиров: Калык дене кыл — йоҥгалтарыме мурем гоч

  1. Петан

    Станислав Шакиров — кече гае. Уло гын — йӧра, уло, шоналтена. Уке гын — ой, кушто Шакировна? — тургыжланена. Мурымыжо шыма, ӱшандарыше, кечыгут колыштам — ом тем. Мурыжын мутшо — йытыра, чатка, марий койышан. Тазалыкым Тылат, Стас! Юмо полшыжо!

  2. Savr

    Таче изи Алексей Станиславовичын шочмо кечыже! Тамара ден Станиславым эргыштын шочмо кечыже дене саламлем!

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s